കൊച്ചി: മമ്മൂട്ടിയും മഞ്ജുവാര്യരും ആദ്യമായി ഒരുമിക്കുന്ന ചിത്രം “ദി പ്രീസ്റ്റ്’ നാളെ തിയറ്ററുകളില്‍ എത്തും. ഈ മാസം നാലിനാണ് ചിത്രത്തിന്‍റെ റിലീസ് പ്രഖ്യാപിച്ചിരുന്നതെങ്കിലും പല രാജ്യങ്ങളിലെയും തിയറ്ററുകള്‍ അടഞ്ഞുകിടക്കുന്നതിനാലും കേരളത്തില്‍ ദിവസേന നാല് ഷോകള്‍ നടത്താന്‍ കഴിയാത്തതിനാലുമാണ് റിലീസ് നീട്ടിയിരുന്നത്.
തിയറ്ററുകളില്‍ സെക്കന്‍ഡ് ഷോ അനുവദിക്കുന്ന കാര്യത്തില്‍ പ്രവര്‍ത്തന സമയം ക്രമീകരിച്ച് സര്‍ക്കാര്‍ ഉത്തരവ് പുറപ്പെടുവിച്ചതോടെ ചിത്രത്തിന്‍റെ റിലീസ് ഡേറ്റ് പ്രഖ്യാപിക്കുകയായിരുന്നു. നവാഗതനായ ജോഫിന്‍ ടി. ചാക്കോയാണ് ചിത്രത്തിന്‍റെ കഥയും സംവിധാനവും നിർവഹിച്ചിരിക്കുന്നത്. തിരക്കഥയൊരുക്കിയിരിക്കുന്നത് ദീപു പ്രദീപും ശ്യാം മേനോനും ചേര്‍ന്നാണ്.
ത്രില്ലര്‍ ചിത്രമാണ് “ദി പ്രീസ്റ്റ്’. ബേബി മോണിക്ക, നിഖില വിമല്‍, ശ്രീനാഥ് ഭാസി, മധുപാല്‍, ജഗദീഷ്, എന്നിവരും ചിത്രത്തില്‍ പ്രധാന വേഷത്തിലെത്തുന്നുണ്ട്. വൈദികന്‍റെ വേഷത്തിലാണ് മമ്മൂട്ടി എത്തുന്നത്. ആന്‍റോ ജോസഫ് ഫിലിം കമ്പനിയും ആര്‍ഡി ഇലുമിനേഷന്‍സ് പ്രസന്‍സിന്‍റെയും ബാനറില്‍ ആന്‍റോ ജോസഫും ബി. ഉണ്ണികൃഷ്ണനും വി.എന്‍. ബാബുവും ചേര്‍ന്നാണ് ചിത്രം നിർമിക്കുന്നത്.
