തിരുവനന്തപുരം : കോൺഗ്രസ് അധ്യക്ഷ തെരഞ്ഞെടുപ്പിന് നാലുനാൾ അവശേഷിക്കെ അധ്യക്ഷ സ്ഥാനത്തേക്ക് മത്സരിക്കുന്ന ശശി തരൂരിനെ അനുകൂലിച്ച് കെപിസിസി ആസ്ഥാനത്ത് ഫ്ലക്സ് ബോർഡ്.
തരൂരിന്‍റെ ചിത്രത്തോടുകൂടിയ ഫ്ലക്സ് ബോർഡിൽ “നാളെയെ കുറിച്ച് ചിന്തിക്കൂ, തരൂരിനെ കുറിച്ച് ചിന്തിക്കൂ, തരൂരിന് വോട്ട് ചെയ്യൂ’ എന്നാണ് എഴുതിയിരിക്കുന്നത്.
കെപിസിസി നേതാക്കളിൽ മിക്കവരും മല്ലികാര്‍ജ്ജുന്‍ ഖര്‍ഗെയെ പിന്തുണയ്ക്കുന്ന പശ്ചാത്തലത്തിലാണ് ശശി തരൂരിനെ അനുകൂലിച്ച് കെപിസിസി ആസ്ഥാനത്ത് ഫ്ലക്സ് ബോർഡ് പ്രത്യക്ഷപ്പെട്ടത്.
അതേസമയം ഇരാറ്റുപേട്ടയിലും ശശി തരൂരിനെ അനുകൂലിച്ച് ഫ്ലക്സ് ബോർഡുകൾ പ്രത്യക്ഷപ്പെട്ടു. ‘ശശി തരൂർ നയിക്കട്ടെ കോൺഗ്രസ് ജയിക്കട്ടെ’ എന്നാണ് ബോർഡിലെ വാചകങ്ങൾ.
കഴിഞ്ഞ ദിവസം കൊല്ലത്ത് വിവിധയിടങ്ങളിലും തരൂർ അനുകൂല ഫ്ളക്സ് ബോർഡുകൾ പ്രത്യക്ഷപ്പെട്ടിരുന്നു.
മല്ലികാർജുൻ ഖർഗെ കഴിഞ്ഞ ദിവസം ഡൽഹിയിൽ പ്രചാരണം നടത്തിയിരുന്നു. ശശി തരൂർ ഡൽഹി പിസിസി ഓഫീസില്‍ ഇന്ന് വോട്ട് തേടും.
