തിരുവില്വാമല: തിരുവില്വാമലയിൽ തെരുവുനായ്ശല്യം രൂക്ഷമായി. പകൽസമയങ്ങളിൽ പോലും തെരുവു നായ്ക്കളുടെ വിളയാട്ടമാണ്. തിരുവില്വാമല മടപ്പുള്ളിക്കളം പരിസരം, ബസ് സ്റ്റാൻഡ് ആശുപത്രിപരിസരം എന്നിവിടങ്ങളിലും റോഡുകളിലും തെരുവു നായ്ക്കൾ കറങ്ങിനടക്കുകയാണ്.
കൂട്ടത്തോടെ എത്തുന്ന തെരുവുനായ്ക്കൾ ജനങ്ങളുടെ സഞ്ചാരത്തിന് ഭീഷണിയായിട്ടുണ്ട്. ഒഴിഞ്ഞ കെട്ടിടങ്ങളും വരാന്തകളും റോഡുകളുമാണ് ഇവയുടെ ആവാസകേന്ദ്രങ്ങൾ. സ്കൂൾ വിദ്യാർഥികളും സ്ത്രീകളും ഭയന്നാണ് സഞ്ചരിക്കുന്നത്. വയോധികർ മാത്രമുള്ള വീടുകളിൽ ഭയത്തോടെയാണ് കഴിയുന്നത്.
ആഴ്ചകൾക്കുമുന്പ് തെരുവുനായ്ക്കൾ കാൽനടയാത്രക്കാരെ കടിച്ച് പരിക്കേല്പിച്ചിരുന്നു. റോഡിനു കുറുകെ ചാടി ഇരുചക്രവാഹനയാത്രക്കാർക്ക് പരിക്കേറ്റ സംഭവങ്ങളും ഉണ്ടായിട്ടുണ്ട്. തെരുവുനായ്ക്കളെ പിടികൂടി വന്ധ്യംകരണം ചെയ്യുന്ന പ്രവർത്തനം ആരംഭിക്കണമെന്ന് ജനങ്ങൾ ആവശ്യപ്പെട്ടു.
