നടി ആക്രമിക്കപ്പെട്ട കേസില്‍ ദിലീപ് അറസ്റ്റിലായിട്ട് ഒരു മാസം പിന്നിട്ടിരിക്കുന്നു. നടിയെ ആക്രമിച്ച കേസില്‍ അറസ്റ്റിലായ ദിലീപിന്റെ ജാമ്യാപേക്ഷ വീണ്ടും പരിഗണിക്കാനിരിക്കേ നടന് പിന്തുണയുമായി സംവിധായകന്‍ തോംസണ്‍ രംഗത്ത്. ദിലീപ് നായകനായ കാര്യസ്ഥന്‍, മമ്മൂട്ടിയും ദിലീപും ഒരുമിച്ചെത്തിയ കമ്മത്ത് ആന്‍ഡ് കമ്മത്ത് എന്നീ സിനിമകളുടെ സംവിധായകനാണ് തോംസണ്‍. ദിലീപ് നിരപരാധിയാണെന്ന് താന്‍ ഉറച്ചുവിശ്വസിക്കുന്നതായി ദിലീപ് ഓണ്‍ലൈനിലൂടെ പുറത്തുവിട്ട വീഡിയോയില്‍ തോംസണ്‍ പറയുന്നു.
ദിലീപിനെതിരെ നടന്നത് ഒരു ഗൂഢാലോചനയാണെന്ന് ഞാന്‍ വിശ്വസിക്കുന്നു. ദിലീപ് എന്ന വ്യക്തിയെ എനിക്ക് നേരിട്ട് അറിയാം. ഒരിക്കലും ഇങ്ങനെ ഒരു നീച പ്രവൃത്തി ചെയ്യാന്‍ ദിലീപ് സന്നദ്ധനാവില്ല. ഇത് ദിലീപിന്റെ നേര്‍ക്കുള്ള ഗൂഢാലോചനയാണെന്ന് ഞാന്‍ വിശ്വസിക്കുന്നു. ഇപ്പോഴും ദിലീപ് കുറ്റവാളിയാണെന്ന് തെളിയിക്കപ്പെട്ടിട്ടില്ല. ദിലീപ് വെറും കുറ്റാരോപിതനാണ്. ആ കുറ്റാരോപിതനായ വ്യക്തിയെക്കുറിച്ച് മാധ്യമങ്ങള്‍ പറയുന്നത് ദിലീപിനെ പൂര്‍ണമായും കുറ്റവാളിയാക്കാനാണ്.
ജാമ്യം നിഷേധിക്കാനുള്ള ഗൂഢ പ്രവര്‍ത്തനം പലയിടത്തും നടക്കുന്നുണ്ട്. ദിലീപ് നിരപരാധിയാണെന്ന് ഞാന്‍ ഇപ്പോഴും വിശ്വസിക്കുന്നു. ദിലീപ് കുറ്റവാളി ആണെന്ന് തെളിഞ്ഞാല്‍ ഈ പറഞ്ഞതിന്റെ പേരില്‍ ദിലീപിന്റെ കൂടെ ഏത് ശിക്ഷയും അനുഭവിക്കാന്‍ ഞാന്‍ തയ്യാറാണ്. നേരത്തെ ദിലീപിന് പിന്തുണയുമായി സംവിധായകന്‍ അടൂര്‍ ഗോപാലകൃഷ്ണന്‍, വൈശാഖ്, നിര്‍മ്മാതാവ് ജി സുരേഷ് കുമാര്‍, ഇക്ബാല്‍ കുറ്റിപ്പുറം, ലാല്‍ജോസ് എന്നിവര്‍ രംഗത്ത് വന്നിരുന്നു. ഇതിനു പിന്നാലെയാണ് ദിലീപിനെ അനുകൂലിച്ചുകൊണ്ട് സംവിധായകന്‍ തോംസണ്‍ രംഗത്തെത്തിയിരിക്കുന്നത്.
