കൗതുകകരമായ വീഡിയോകള്‍ സോഷ്യല്‍ മീഡിയയില്‍ പങ്കുവെയ്ക്കുന്ന ചില സെലിബ്രിറ്റികളുണ്ട്. അത്തരത്തിലൊരാളാണ് മഹീന്ദ്ര ഗ്രൂപ്പ് ചെയര്‍മാന്‍ ആനന്ദ് മഹീന്ദ്ര.
ആനന്ദിന്റെ ‘മണ്ടേ മോട്ടിവേഷന്‍’ സന്ദേശങ്ങള്‍, പലപ്പോഴും പ്രചോദനം നല്‍കുന്നവയാണ്.
ഇപ്പോഴിതാ തിങ്കളാഴ്ച മോട്ടിവേഷന്‍ വീഡിയോയായി ആനന്ദ് പങ്കിട്ടിരിക്കുന്നത് ഒരു താറാവിനെ പിടിക്കാനെത്തുന്ന കടുവയ്ക്ക് പറ്റുന്ന അബദ്ധമാണ്.
താറാവും കടുവയും കൂടിയുള്ള ഒരു വീഡിയോയാണ് മഹീന്ദ്ര പങ്കിട്ടിരിക്കുന്നത്. വീഡിയോയില്‍ കടുവ അതിന്റെ ഇരയായ താറാവിന്റെ അടുത്തേക്ക് കുതിക്കാനായി വെളളത്തിലൂടെ വളരെ സാവധാനത്തില്‍ വരുന്നത് കാണാം.
പക്ഷേ ഓരോ തവണയും അത് അടുത്തുവരുമ്പോള്‍, താറാവ് നദിയില്‍ മുങ്ങി മറ്റൊരു സ്ഥലത്ത് നിന്ന് ഉയര്‍ന്നുവരുന്നത് കാണാം.
ശക്തനാണെങ്കില്‍ കൂടി കടുവയെ ഇത് തികച്ചും ആശയക്കുഴപ്പത്തിലാക്കുന്നുണ്ട്. ”വിജയവും ചിലപ്പോള്‍ അതിജീവനവും ഉണ്ടാകുന്നത് നിങ്ങളുടെ അടുത്ത നീക്കം വ്യക്തമാകാത്തതില്‍ നിന്നാണ്…” എന്ന ക്യാപ്ഷനും നല്‍കിയാണ് ആനന്ദ് മഹീന്ദ്ര വീഡിയോ പങ്കിട്ടിരിക്കുന്നത്.
