കോഴിക്കോട്: മലപ്പുറം പാണ്ടിക്കാട്ട് വഴിയാത്രക്കാരുടെ നേര്‍ക്ക് ടിപ്പര്‍ ലോറി പാഞ്ഞുകയറി യുവതി മരിച്ചു. ഒരാള്‍ക്ക് പരിക്കേറ്റു. മേലാറ്റൂര്‍ സ്വദേശി ഹേമലത (40) ആണ് മരിച്ചത്. ഒപ്പമുണ്ടായിരുന്ന സിന്ധുമോള്‍ക്കാണ് പരിക്കേറ്റത്.
ഇന്നു രാവിലെ ഏഴിനാണ് അപകടം. ഹേമലതയുടെ മകള്‍ സ്വകാര്യ ആശുപത്രിയില്‍ പ്രസവിച്ചുകിടക്കുകയാണ്. അവര്‍ക്ക് ചായ വാങ്ങാന്‍വേണ്ടി പുറത്തിറങ്ങിയതായിരുന്നു ഹേമലത.
സിന്ധുമോളും ഹേമലതയും റോഡരികിലൂടെ നടന്നുപോകുമ്പോള്‍ പിന്നില്‍ നിന്ന് ചീറിപ്പാഞ്ഞുവന്ന ടിപ്പര്‍ലോറി ഇടിച്ചുവീഴ്ത്തുകയായിരുന്നു. ഹേമലത സംഭവ സ്ഥലത്തുവച്ച് മരിച്ചു.
സാരമായി പരിക്കേറ്റ സിന്ധുമോളെ പെരിന്തല്‍മണ്ണ മൗലാന ആശുപത്രിയില്‍ പ്രവേശിപ്പിച്ചു. ഇവര്‍ സുഖം പ്രാപിച്ചുവരുന്നു.
