ഡോര്‍ട്മുണ്ട്: രണ്ടുപാദങ്ങളിലും ബൊറൂസിയ ഡോര്‍ട്മുണ്ടിനെ തോല്‍പ്പിച്ച് ടോട്ടനം ചാമ്പ്യന്‍സ് ലീഗ് ക്വാര്‍ട്ടറില്‍. ഡോര്‍ട്മുണ്ടില്‍ നടന്ന രണ്ടാം പാദത്തില്‍ ടോട്ടനം ഏകപക്ഷീയമായ ഒരു ഗോളിന്‍റെ ജയം സ്വന്തമാക്കി. ആദ്യപാദത്തില്‍ ടോട്ടനം 3-0ന് ജയിച്ചിരുന്നു. അഗ്രഗേറ്റില്‍ ടോട്ടനത്തിന് 4-0ന്‍റെ ജയം. സ്വന്തം ഗ്രൗണ്ടില്‍ ജയം മോഹിച്ച ബൊറൂസിയ ആദ്യ പകുതിയില്‍ ശക്തമായി ആക്രമിച്ചു കളിച്ചു.
എന്നാല്‍, ഗോളൊന്നുമടിക്കാനായില്ല. ആദ്യ പാദത്തിലെ മികച്ച ലീഡില്‍ സമ്മദമില്ലാതെ കളിച്ച ടോട്ടനം മികച്ച പ്രതിരോധത്തിലൂടെ ബൊറൂസിയയുടെ ആക്രമണങ്ങള്‍ തടഞ്ഞു. ബൊറൂസിയ താരങ്ങള്‍ വല ലക്ഷ്യമാക്കിയപ്പോള്‍ ഗോള്‍കീപ്പര്‍ ഹ്യൂഗോ ലോറിസ് തടസമായി.
രണ്ടാം പകുതി തുടങ്ങി മൂന്നു മിനിറ്റായപ്പോള്‍ ടോട്ടനം ലീഡ് നാലാക്കി. ഹാരി കെയ്‌നാണ് ഗോള്‍ നേടിയത്. ടോട്ടനം രണ്ടാം തവണയാണ് ചാമ്പ്യന്‍സ് ലീഗിന്‍റെ ക്വാര്‍ട്ടര്‍ ഫൈനലിലെത്തുന്നത്. 2010-11ലായിരുന്നു ആദ്യം.
