യാത്രകൾ ഇഷ്ടപ്പെടാത്തവർ കുറവാണ്. ദൂരെ യാത്ര ചെയ്യുന്പോൾ ബസിലായാലും, ട്രെയിനിലായാലും എന്തിനേറെ വിമാനത്തിൽ പോലും വിൻഡോ സീറ്റ് തെരഞ്ഞെടുക്കുന്നവരാണ് നമ്മൾ. അത്തരത്തിൽ ട്രെയിൻ യാത്രയ്ക്ക് വിൻഡോ സീറ്റ് ബുക്ക് ചെയ്ത ഒരാള്‍ക്ക് കിട്ടിയ പണിയാണ് സോഷ്യല്‍ മീഡിയയില്‍ ചിരി പടര്‍ത്തുന്നത്.
ദൂരെ യാത്രയ്ക്കായി പുറപ്പെട്ട യുവാവ് ട്രെയിനിൽ വിൻഡോ സീറ്റ് ബുക്ക് ചെയ്തു. എന്നാൽ ട്രയിനിൽ കയറിയപ്പോഴാണ് തനിക്ക് പറ്റിയ അമളി യുവാവ് തിരിച്ചറിഞ്ഞത്. സീറ്റിന്‍റെ മുന്നിലും പിറകിലും വിൻഡോ ഉണ്ട്, എന്നാൽ തനിക്ക് ലഭിച്ച സീറ്റിന് മാത്രം വിൻഡോ ഇല്ല. സോഷ്യല്‍ മീഡിയയിലൂടെ യുവാവ് ഇതിന്‍റെ ചിത്രം സഹിതം പങ്കുവച്ചതോടെ സംഭവം വൈറലായി.
നിരവധി ആളുകളാണ് യുവാവിന്‍റെ പോസ്റ്റിനു കമന്‍റുമായി രംഗത്തെത്തിയത്. വിൻഡോ ഇല്ലെങ്കിലെന്താ ചാര്‍ജര്‍ പോയിന്‍റ് ഉണ്ടല്ലോ അതോർത്ത് സമാധാനിക്കൂ എന്നാണ് യുവാവിനെ മറ്റുള്ളവർ ആശ്വസിപ്പിച്ചത്.
