ബ്രസൽസ്: പാഞ്ഞു വന്ന ട്രെയിനിനു മുന്നിലേക്ക് യുവതിയെ തള്ളിയിട്ട് കൊലപ്പെടുത്താന്‍ ശ്രമം. ബെല്‍ജിയത്തിന്‍റെ തലസ്ഥാനമായ ബ്രസല്‍സിലെ റോജിയര്‍ മെട്രോ സ്‌റ്റേഷനിലാണ് സംഭവം.
ട്രെയിന്‍ കാത്ത് നിന്ന യുവതിയെ പിന്നില്‍ കൂടിയെത്തിയയാള്‍ റെയില്‍വേ ട്രാക്കിലേക്ക് തള്ളിയിടുകയായിരുന്നു. ഈ സമയം ട്രെയിന്‍ മെട്രോ സ്‌റ്റേഷനിലേക്ക് കുതിച്ചെത്തിയിരുന്നു.
യുവതിയുടെ സമീപമെത്തിയ ട്രെയിനിന്‍റെ ഡ്രൈവർ സംഭവം കണ്ട് ഞൊടിയിടയിൽ ട്രെയിൻ നിര്‍ത്തിയതിനാല്‍ ദുരന്തമൊഴിവായി.
സമീപമുണ്ടായിരുന്ന യാത്രികര്‍ ഉടന്‍തന്നെ യുവതിയെ ട്രാക്കില്‍ നിന്നും മാറ്റുകയും ചെയ്തു. നിസാര പരിക്കേറ്റ യുവതിയെ ആശുപത്രിയില്‍ പ്രവേശിപ്പിച്ചു.
ട്രെയിന്‍ ഡ്രൈവറുടെ സമയോചിതമായ ഇടപെടലിലൂടെയാണ് യുവതിയുടെ ജീവന്‍ തിരികെ ലഭിച്ചത്.
സംഭവത്തിന് ശേഷം ഓടിരക്ഷപെടാന്‍ ശ്രമിച്ച ആക്രമിയെ മറ്റൊരു മെട്രോ സ്‌റ്റേഷനില്‍ നിന്നും പിടികൂടിയതായി പോലീസ് അറിയിച്ചു. ഇയാള്‍ക്കെതിരെ കൊലപാതക ശ്രമത്തിന് കേസെടുത്തു.
