അബുദാബി : മരുഭൂമിയിലെ കടന്പകൾ താണ്ടി എത്തിഹാദ് റെയിൽ എന്ന സ്വപ്നം അതിവേഗം നിശ്ചിത ട്രാക്കിലൂടെ മുൻപോട്ടു കുതിക്കുകയാണ് .
എത്തിഹാദ് റെയിൽ ചെയർമാൻ ഷെയ്ഖ് തേയാബ് ബിൻ മുഹമ്മദ് ബിൻ സായിദ് നേരിട്ടെത്തിയാണ് റെയിൽ നിർമ്മാണത്തിന്‍റെ പുരോഗതി വിലയിരുത്തിയത്.
യുഎഇയിലെ രണ്ടു വലിയ എമിറേറ്റുകളെ ബന്ധിപ്പിക്കുന്ന രണ്ടാംഘട്ടത്തിലെ ട്രാക്ക് നിർമ്മാണം പരിശോധിക്കാനാണ് ഷെയ്ഖ് തെയാബ് ബിൻ മുഹമ്മദ് ബിൻ സായിദ് നേരിട്ടെത്തിയത്.
നിർമ്മാണ കേന്ദ്രമായ Seih Shuaibൽ നിന്നും അബുദാബി ഭാഗത്തേക്കും ദുബായ് ഭാഗത്തേക്കുമായി 10 കിലോമീറ്റർ ദൂരം ഇൻസ്പെക്ഷൻ ട്രെയിനിൽ യാത്ര നടത്തുകയും ചെയ്തു.
1000 കിലോമീറ്റർ ദൂരപരിധിയുള്ള രണ്ടാം ഘട്ടത്തിൽ സൗദിയുടെ അതിർത്തിയായ ഗുവെയ്ഫാത്തിനെ ഫുജൈറയുമായി സംയോജിപ്പിക്കുന്ന ഏറ്റവും വലിയ പദ്ധതിയാണ് ഇപ്പോൾ പുരോഗമിക്കുന്നത്.
വന്യമൃഗങ്ങളുടെ ആവാസവ്യവസ്ഥയെ അലോസരപ്പെടുത്താതെയും അവയുടെ സഞ്ചാര പഥങ്ങളെ തടസപ്പെടുത്താതെയും പാലങ്ങളും, കനാലുകളും നിർമ്മിച്ചാണ് നാല് പാതയുടെ നിർമ്മാണം മുന്നേറുന്നത്.
35 പാലങ്ങളും 15 തുരങ്കങ്ങളും പാതയിലുണ്ടാകും എന്നാണ് സൂചിപ്പിക്കുന്നത്. റുവൈസിനെ ഗുവെയ്ഫാത്തുമായി ബന്ധിപ്പിക്കുന്ന 139 കിലോമീറ്റർ പാതയുടെ 59 ശതമാനം നിർമാണവും പൂർത്തീകരിച്ചിട്ടുണ്ട്.
എത്തിഹാദ് റയിലിന്‍റെ ഒന്നാംഘട്ടമായ ഹബ്ഷാനിൽ നിന്നും റുവൈസിലേക്കുള്ള ഭാഗം ഇപ്പോൾ പ്രവർത്തനനിരതമാണ്. മരുഭൂമിയിലെ മണലിൽ പ്രത്യേക സാങ്കേതിക വിദ്യകൾ ഉപയോഗപ്പെടുത്തിയാണ് ട്രാക്ക് നിർമാണം നടക്കുന്നത്.
യുഎഇയിലെ റെയിൽ ശൃംഖല പൂർത്തിയാകുന്പോൾ സൗദി റെയിലുമായി ബന്ധിപ്പിക്കുന്നതിനു പദ്ധതിയുണ്ട്. ഇതോടെ ജിസിസി രാജ്യങ്ങളിലെ ഗതാഗത മേഖലയിൽ വന്പിച്ച മാറ്റങ്ങളാകും വന്നു ചേരുന്നത്.
റിപ്പോർട്ട്: അനിൽ സി. ഇടിക്കുള
