ന്യൂസിലൻഡിന്‍റെ തെക്കേ അറ്റത്തെ കാംബൽ ദീപിൽ ഒരു മരമുണ്ട്; സിട്ക സ്പുറസ്. ആ ദ്വീപിൽ ആകെയുള്ള വൃക്ഷം. ഗിന്നസ് ബുക്ക് ഓഫ് റിക്കാർഡ്സ് പ്രകാരം ലോകത്തെ ഏറ്റവും ഒറ്റപ്പെട്ട വൃക്ഷം എന്ന പെരുമയോടെയാണ് വൃക്ഷത്തിന്‍റെ നിൽപ്.
എന്നാൽ, 100 വർഷത്തിലേറെയായി ഏകാന്തതയുടെ ദുഃഖം പേറുന്നതിനാലാകാം പെരുമയ്ക്കൊത്ത തലയെടുപ്പൊന്നും സിട്ക വൃക്ഷത്തിനില്ല. സ്നേഹം കിട്ടാതെ വളർന്നവനെപ്പോലെ മുരടിച്ചങ്ങനെ നില്ക്കുന്നു. കൊടുങ്കാറ്റ്, മഴ തുടങ്ങിയ പ്രതികൂല കാലാവസ്ഥകളാണു കാംബൽ ദ്വീപിനെ മരങ്ങൾക്ക് അനുയോജ്യമല്ലാതാക്കുന്നതെന്നാണ് ശാസ്ത്രജ്ഞർ പറയുന്നത്.
എന്നാൽ, ചെറുചെടികളും കുറ്റിച്ചെടികളുമൊക്കെ ദ്വീപിൽ തഴച്ചുവളരുന്നുണ്ട്. എങ്ങനെയാണ് സിട്ക സ്പുറസ് മാത്രം ദ്വീപിലെ പ്രതികൂല കാലാവസ്ഥയെ അതിജീവിക്കുന്നതെന്ന കാര്യത്തിൽ ശാസ്ത്രജ്ഞർക്ക് ഇപ്പോഴും വ്യക്തതയില്ല. ന്യൂസിലൻഡിലെ ഗവർണറായിരുന്ന ലോർഡ് റാൻഫുർലി 1901ൽ നട്ടുവളർത്തിയതാണ് ഈ വൃക്ഷമെന്നാണ് പരക്കെയുള്ള വിശ്വാസം.
