ട്രക്ക് ബസിൽ ഇടിച്ച് 11 പേർ മരിച്ചു. 12 പേർക്ക് അപകടത്തിൽ പരിക്കേൽക്കുകയും ചെയ്തു. രാജസ്ഥാനിലെ ഭരത്പൂരിൽ ദേശീയ പാതയിലാണ് സംഭവം. രാജസ്ഥാനിലെ പുഷ്‌കറിൽ നിന്ന് ഉത്തർപ്രദേശിലെ വൃന്ദാവനിലേക്ക് പോവുകയായിരുന്ന ബസാണ് പുലർച്ചെ 4.30 ഓടെ അപകടത്തിൽപ്പെട്ടത്.
അമിതവേഗതയിലെത്തിയ ട്രക്ക് വാഹനത്തിൽ ഇടിക്കുമ്പോൾ ബസ് ഡ്രൈവറും ചില യാത്രക്കാരും ബസിന് പിന്നിൽ നിൽക്കുകയായിരുന്നുവെന്ന് രക്ഷപ്പെട്ട ഒരാൾ പറയുന്നു.
ഇന്ധനം തീർന്നതിനെ തുടർന്ന് ലഖൻപൂർ മേഖലയിലെ ആന്ത്ര ഫ്‌ളൈഓവറിൽ ബസ് നിർത്തിയപ്പോൾ പിന്നിൽ നിന്ന് ട്രക്ക് ഇടിക്കുകയായിരുന്നു. അഞ്ച് പുരുഷന്മാരും ആറ് സ്ത്രീകളും സംഭവസ്ഥലത്ത് തന്നെ മരിച്ചതായി പോലീസ് അറിയിച്ചു.
ബസ് ഹൈവേയിൽ നിർത്തിയിട്ടിരിക്കുമ്പോഴാണ് അപകടം. ചില യാത്രക്കാർ ബസിലുണ്ടായിരുന്നു, ചിലർ കൂട്ടിയിടിക്കുമ്പോൾ പുറത്ത് നിൽക്കുകയായിരുന്നെന്നും ഭരത്പൂർ പോലീസ് സൂപ്രണ്ട് (എസ്പി) മൃദുൽ കചവ പറഞ്ഞു.
