പേരൂര്‍ക്കട: ഭര്‍ത്താവിനെയും മകളെയും കൊലപ്പെടുത്താന്‍ ശ്രമിച്ചതിന് ഭാര്യ അറസ്റ്റില്‍. സ്വര്‍ണാഭരണങ്ങളുമായി ബന്ധപ്പെട്ട വിഷയത്തില്‍ ഭര്‍ത്താവിനെയും 17കാരിയായ മകളെയും ജ്യൂസില്‍ ഉറക്കഗുളിക കലര്‍ത്തി നല്‍കി കൊലപ്പെടുത്താന്‍ ശ്രമിച്ച കേസിലാണ് നാലാഞ്ചിറ കുരിശടി സ്വദേശിനി സുമന്‍ അറസ്റ്റിലായത്. ഒരാഴ്ച മുമ്പാണ് സംഭവം നടക്കുന്നത്.
ഇരുനിലവീട്ടില്‍ മൂന്നുപേരെ അബോധാവസ്ഥയില്‍ കണ്ടതായുള്ള നാട്ടുകാരുടെ പരാതിയില്‍ പോലീസ് എത്തി പരിശോധന നടത്തുകയും ഇവരെ ആശുപത്രിയിലേക്കു മാറ്റുകയും ചെയ്തിരുന്നു. സംഭവത്തില്‍ ദുരൂഹതയുണ്ടാകുകയും മജിസ്ട്രേറ്റ് മൂവരുടെയും മൊഴി രേഖപ്പെടുത്തുകയും ചെയ്തിരുന്നു.
ഭര്‍ത്താവ് സ്വര്‍ണാഭരണങ്ങള്‍ തിരിമറി നടത്തിയതുമായി ബന്ധപ്പെട്ടാണ് തനിക്ക് വൈരാഗ്യമുണ്ടായതെന്നു ഭാര്യ മൊഴി നല്‍കിയിരുന്നു. ഭര്‍ത്താവ് പോലീസില്‍ നല്‍കിയ പരാതിയിലാണ് അറസ്റ്റ്. ഇവരെ കോടതിയില്‍ ഹാജരാക്കി.
