ന്യൂഡൽഹി: ഇരട്ട നവജാത ശിശുക്കൾ മരിച്ചെന്ന് സ്വകാര്യ ആശുപത്രിയിലെ ഡോക്‌ടർമാർ തെറ്റായി വിധിയെഴുതിയ സംഭവത്തിൽ പ്രതിഷേധം ശക്തം. ആശുപത്രി അധികൃതർക്കെതിരേ നടപടി ആവശ്യപ്പെട്ട് ഇരട്ടക്കുട്ടികളുടെ ബന്ധുക്കൾ ആശുപത്രിക്കു മുന്നിൽ പ്രതിഷേധം ആരംഭിച്ചു. സംഭവത്തെക്കുറിച്ച് അന്വേഷിച്ച് റിപ്പോർട്ട് നൽകാൻ കേന്ദ്ര ആരോഗ്യ മന്ത്രി ജെ.പി നാഡ ഡൽഹി സർക്കാരിനോട് ആവശ്യപ്പെട്ടു.
സ്വകാര്യ ആശുപത്രിയിലെ ഡോക്‌ടർമാർ മരിച്ചെന്നു വിധിയെഴുതിയ ഇരട്ട നവജാത ശിശുക്കളെ മരണാനന്തര ചടങ്ങുകൾക്ക് എടുത്തപ്പോൾ ഒരു കുഞ്ഞിനു ജീവനുണ്ടെന്നു കണ്ടെത്തുകയായിരുന്നു. ഉടൻ മറ്റൊരാശുപത്രിയിൽ കുഞ്ഞിനെ എത്തിക്കുകയായിരുന്നു. ഡൽഹി മാക്സ് ആശുപത്രി അധികൃതരാണു മരിച്ചെന്നു പറഞ്ഞ് ഇരട്ടക്കുട്ടികളെ പ്ലാസ്റ്റിക് ബാഗുകളിലാക്കി മാതാപിതാക്കൾക്കു കൈമാറിയത്. ഇതിലൊരു കുട്ടിക്കാണു ജീവനുണ്ടെന്നു കണ്ടെത്തിയത്.
കഴിഞ്ഞ ചൊവ്വാഴ്ചയാണു വർഷ എന്ന യുവതിയെ പ്രസവത്തിനായി ആശുപത്രിയിൽ പ്രവേശിപ്പിച്ചത്. വ്യാഴാഴ്ച രാത്രി ഏഴരയോടെ സിസേറിയനിലൂടെ ആദ്യം ഒരു ആണ്‍കുട്ടിക്കും 12 മിനിറ്റിനുശേഷം പെണ്‍കുട്ടിക്കും ജന്മം നൽകി. കുറച്ചുകഴിഞ്ഞു പെണ്‍കുട്ടി മരിച്ചുവെന്നും ആണ്‍കുട്ടിയുടെ നില കുഴപ്പത്തിലാണെന്നും ഡോക്‌ടർമാർ അറിയിച്ചു. പിന്നീട് ആണ്‍കുട്ടിയും മരിച്ചതായി ഡോക്‌ടർമാർ പറഞ്ഞു. തുടർന്ന് കുഞ്ഞുങ്ങളുടെ മൃതദേഹങ്ങൾ പ്ലാസ്റ്റിക് ബാഗുകളിലാക്കി ഇവർക്കു കൈമാറുകയായിരുന്നു.
മരണാനന്തര ചടങ്ങുകൾക്കായി കുഞ്ഞുങ്ങളെ കൊണ്ടു പോകവേയാണു പ്ലാസ്റ്റിക് സഞ്ചികളിൽ ഒന്നിൽ അനക്കം കണ്ടത്. ഉടൻ ബാഗ് തുറന്നപ്പോൾ ആണ്‍കുട്ടി ശ്വസിക്കുന്നതായി കണ്ടു. ഒട്ടും വൈകാതെ കുട്ടിയെ അടുത്തുള്ള മറ്റൊരു ആശുപത്രിയിൽ എത്തിച്ചു. ഇപ്പോൾ കുഞ്ഞ് ചികിത്സയിലാണെന്നു വർഷയുടെ പിതാവ് പ്രവീണ്‍ കുമാർ പറഞ്ഞു. ബന്ധുക്കളുടെ പരാതിയിൽ ആശുപത്രിക്കെതിരേ കേസെടുത്തതായി പോലീസ് പറഞ്ഞു. സംഭവത്തെക്കുറിച്ച് അന്വേഷണം ആരംഭിച്ചതായും സംഭവിക്കാൻ പാടില്ലാത്തതാണ് ഉണ്ടായതെന്നും മാക്സ് ആശുപത്രി അധികൃതർ പറഞ്ഞു.
