കൊച്ചി: നഗരത്തില്‍ 4.28 ഗ്രാം എംഡിഎംഎയുമായി രണ്ടു യുവാക്കള്‍ അറസ്റ്റിലായ കേസില്‍ പ്രതികളുടെ കൂട്ടാളികള്‍ക്കായി പോലീസ് അന്വേഷണം ആരംഭിച്ചു.
കേസുമായി ബന്ധപ്പെട്ട് പച്ചാളം കൂവക്കാട്ട് വീട്ടില്‍ കെ.എ. അരുണ്‍ജിത്ത്(27), ഫോര്‍ട്ടുകൊച്ചി അറക്കപ്പറമ്പില്‍ നിസാം (27) എന്നിവരെ എറണാകുളം നോര്‍ത്ത് പോലീസും ഡാന്‍സാഫും ചേര്‍ന്ന് പച്ചാളം ഭാഗത്തുനിന്ന് പിടികൂടിയിരുന്നു.
ഇവരുടെ പക്കല്‍നിന്ന് വില്പനയ്ക്കായി കരുതിയിരുന്ന 4.28 ഗ്രാം എഡിഎംഎ പിടിച്ചെടുത്തു. ഇവര്‍ക്ക് ലഹരിമരുന്ന് എത്തിച്ചു നല്‍കിയിരുന്നത് എറണാകുളം കേന്ദ്രീകരിച്ചു പ്രവര്‍ത്തിക്കുന്ന മയക്കുമരുന്നു സംഘത്തിലെ ആളാണെന്ന് പോലീസ് കണ്ടെത്തിയിട്ടുണ്ട്. ഇവരെ കേന്ദ്രീകരിച്ച് അന്വേഷണം ആരംഭിച്ചു.
അരുണ്‍ജിത്ത് പച്ചാളം കാട്ടുങ്കലില്‍ ഇരുചക്രവര്‍ക് ഷോപ്പ് നടത്തുന്ന ആളാണ്. നിസാമിന് പാലാരിവട്ടം ജനതയില്‍ സലൂണുണ്ട്. ഇവിടെ വാഹനം നന്നാക്കാനായി എത്തുന്നവരില്‍ ആവശ്യക്കാര്‍ക്ക് ലഹരിമരുന്ന് എത്തിച്ചുകൊടുക്കുന്നതാണ് ഇവരുടെ രീതി. പ്രതികളെ ഇന്ന് ഉച്ചയ്ക്കു ശേഷം കോടതിയില്‍ ഹാജരാക്കും.
