മാവേലിക്കര: ഗജരത്നം മാവേലിക്കര ഉണ്ണികൃഷ്ണൻ ചെരിഞ്ഞു. ഇന്ന് പുലർച്ചെ 2.04 ഓടെയായിരുന്നു അന്ത്യം. കഴിഞ്ഞ നാലുമാസമായി ഉദരസംബന്ധമായ അസുഖത്താൽ ചികിത്സയിലായിരുന്ന ഉണ്ണികൃഷ്ണൻ ഇന്നലെ വൈകുന്നേരം 5.30 ഓടെ കുഴഞ്ഞു വീഴുകയായിരുന്നു. 1992 മാർച്ച് 15ന് അന്നത്തെ ദേവസ്വം ഭരണസമിതിയുടേയും നാട്ടുകാരുടെയും ശ്രമഫലമായി ബോർഡ് പ്രസിഡന്‍റ് രാമൻ ഭട്ടതിരിപ്പാട് ആണ് ആനയെ നടക്കിരുത്തിയത്.
തിരുവിതാംകൂർ ദേവസം ബോർഡിലെ തലയെടുപ്പുള്ള ആനകളിൽ മൂന്നാം സ്ഥാനക്കാരനായിരുന്നു. തൃശൂർപൂരം ഉൾപ്പടെയുള്ള പുരങ്ങളിലും. ശബരിമലയിലും നിരവധി തവണ എഴുന്നള്ളിച്ചിട്ടുള്ള ശാന്തനായതും ലക്ഷണം ഒത്തതുമായ ആനയായിരുന്നു ഉണ്ണികൃഷ്ണൻ. കളഭ കേസരി, ഗജരത്നം തുടങ്ങിയ പട്ടങ്ങളും ലഭിച്ചിട്ടുണ്ട്. കേരള ഫോറസ്റ്റ് കോടനാട് ഡിവിഷനിൽ നിന്നാണ് ഉണ്ണികൃഷ്ണനെ വാങ്ങിയത്.
ഗജരാജൻ ഉണ്ണികൃഷ്ണന്‍റെ വേർപാട് നാടിനെ കണ്ണീരിലാഴ്ത്തി. ആനയുടെ വേർപാട് അറിഞ്ഞതുമുതൽ സ്ത്രീകളും കുട്ടികളും ഉൾപ്പടെ നിരവധി പേരാണ് ക്ഷേത്രത്തിലേക്ക് എത്തിക്കൊണ്ടിരിക്കുന്നത്. ക്ഷേത്രാങ്കണത്തിൽ പെതു ദർശനത്തിന് വച്ച ജഡത്തിൽ ദേവസ്വം ബോർഡ് അംഗം കെ.രാഘവൻ, ദേവസ്വം ഡപ്യൂട്ടി കമ്മീഷണർ ഡി. ബൈജു, എൻഎസ്എസ് മാവേലിക്കര താലൂക്ക് യൂണിയൻ പ്രസിഡന്‍റ് ടി.കെ. പ്രസാദ് തുടങ്ങി രാഷ്ട്രീയ സാംസ്കാരിക രംഗത്തെ പ്രമുഖർ അടക്കം നൂറ് കണക്കിന് ആളുകൾ ആദരാഞ്ജലികൾ അർപ്പിച്ചു.
ഒരു നാട്ടാന എന്ന നിലയിൽ എല്ലാ ലക്ഷണങ്ങളും ഒത്ത ആനയായിരുന്നു ഉണ്ണികൃഷ്ണൻ. 18 നഖങ്ങൾ, ഉയർന്ന മസ്തകം, കൊന്പുകൾ എന്നിവയും അതിലുപരി ശാന്തസ്വഭാവവും ഉണ്ണികൃഷ്ണനെ നാട്ടുകാരുടെ പ്രിയങ്കരനാക്കി. 1992 ൽ ക്ഷേത്രത്തിൽ എത്തിച്ച ആന ആദ്യ കാലങ്ങളിൽ വലിയ ശബ്ദം കേട്ടാൽ ഓടുന്ന സ്വഭാവക്കാരനായിരുന്നു. ഓടുന്ന സമയങ്ങളിൽ പോലും നാശനഷ്ടങ്ങളോ ജീവഹാനിയോ ഉണ്ടാക്കിയിട്ടില്ല. ഫോറസ്റ്റിന്റെ മേൽ നടപടികൾക്ക് ശേഷം കോന്നിയിലേക്ക് സംസ്കാരത്തിനായി കൊണ്ടു പോകും
