കോട്ടയം: വീട്ടുജോലിക്കെത്തി മോഷണം നടത്തിയ ശേഷം ഇതരസംസ്ഥാനത്തേക്കു കടക്കാന്‍ ശ്രമിച്ച യുവതിയെ നിമിഷങ്ങള്‍ക്കകം പോലീസ് അറസ്റ്റ് ചെയ്തു. ഉത്തര്‍പ്രദേശ് സ്വദേശിനിയായ ആതിഫാ ഖാട്ടൂണ്‍ (അസിയാബാനു 24) നെയാണ് കോട്ടയം ഈസ്റ്റ് പോലീസ് അറസ്റ്റ് ചെയ്തത്.
ഇവര്‍ കൊല്ലാട് സെന്‍റ് പോള്‍സ് പള്ളിയ്ക്കു സമീപമുള്ള മര്‍ച്ചന്‍റ് നേവി ഉദ്യോഗസ്ഥന്റെ വീട്ടില്‍ ഒരു മാസമായി വീട്ടുജോലി ചെയ്തുവരികയായിരുന്നു.
കഴിഞ്ഞദിവസം ഉദ്യോഗസ്ഥന് അമ്മയെ തനിച്ചാക്കി ആശുപത്രിയില്‍ പോയ സമയത്ത് ഇവര്‍ വീട്ടിലെ അലമാരയില്‍ സൂക്ഷിച്ചിരുന്ന ഒരു ലക്ഷത്തി നാൽപ്പതിനായിരം രൂപയും അമ്മയുടെ കഴുത്തില്‍ കിടന്നിരുന്ന മൂന്നു പവന്‍ വരുന്ന സ്വര്‍ണമാലയും മോഷ്ടിച്ചു കടന്നുകളഞ്ഞു.
തുടര്‍ന്ന് ഉദ്യോഗസ്ഥന് വിവരം കോട്ടയം ഈസ്റ്റ് പോലീസില്‍ അറിച്ചു. ഈസ്റ്റ് പോലീസ് ഉടനടി നഗരം കേന്ദ്രീകരിച്ച് നടത്തിയ തെരച്ചിലില്‍ ഇവരെ മാലയും പണവുമായി കോട്ടയം റെയില്‍വേ സ്റ്റേഷനില്‍ നിന്ന് റെയില്‍വേ പോലീസിന്‍റെ സഹായത്തോടെ പിടികൂടി. കോടതിയില്‍ ഹാജരാക്കിയ പ്രതിയെ റിമാന്‍ഡ് ചെയ്തു.
