ഉത്തര്‍പ്രദേശില്‍ മൂന്ന് പേര്‍ ചേര്‍ന്ന് യുവതിയെ കൂട്ടമാനഭംഗത്തിന് ഇരയാക്കി. യുപിയിലെ ഉന്നാവോയിലാണ് സംഭവം. പീഡിപ്പിച്ചതിനു ശേഷം ഇവര്‍ ഇതിന്റെ ദൃശ്യങ്ങള്‍ പകര്‍ത്തി പ്രചരിപ്പിക്കുകയും ചെയ്തു. സംഭവത്തില്‍ രണ്ടു പേരെ പോലീസ് അറസ്റ്റ് ചെയ്തു. രാഹുല്‍, ആകാശ് എന്നിവരെയാണ് ഗംഗാഘട്ട് പോലീസ് അറസ്റ്റ് ചെയ്തത്. ആറു പേര്‍ ഉള്‍പ്പെട്ട സംഘം വീട്ടില്‍ നിന്ന് യുവതിയെ തട്ടിക്കൊണ്ടു വരികയും ഒറ്റപ്പെട്ട പ്രേദശത്തെത്തിച്ച് പീഡിപ്പിക്കുകയുമായിരുന്നെന്നാണ് വിവരം.
മൂന്നു പേര്‍ ചേര്‍ന്ന് യുവതിയെ വലിച്ചിഴക്കുന്നതിന്റെ ദൃശ്യങ്ങളാണ് പുറത്തുവന്നത്. ദൃശ്യങ്ങളിലുള്ള മൂന്ന് പേര്‍ക്കു പുറമേ മറ്റുള്ളവര്‍ക്കായും പോലീസ് തെരച്ചില്‍ ഊര്‍ജിതമാക്കി. മൂന്നുപേര്‍ ചേര്‍ന്ന് പെണ്‍കുട്ടിയെ കാട്ടിലേയ്ക്ക് വലിച്ചു കൊണ്ടുപോകുമ്പോള്‍ നാലാമന്‍ ഇതിന്റെ വീഡിയോ ദൃശ്യങ്ങള്‍ പകര്‍ത്തുകയാണ്. പെണ്‍കുട്ടി അലറിവിളിക്കുന്നത് വീഡിയോയില്‍ വ്യക്തമാണ്. ‘ഭയ്യാ ഒന്നും ചെയ്യല്ലേ..’ എന്ന് പറഞ്ഞ് നിലവിളിക്കുന്ന പെണ്‍കുട്ടിയെ അക്രമികള്‍ ചീത്തവിളിക്കുന്നതും വീഡിയോയില്‍ കാണാം.
തന്നെയൊന്നും ചെയ്യരുതേയെന്നും വിട്ടയക്കണമെന്നും യുവതി ആവര്‍ത്തിച്ച് ഇവരോട് യാചിക്കുന്നതും ദൃശ്യങ്ങളില്‍ വ്യക്തമാണ്. അതേസമയം, എന്നാണ് ഈ സംഭവം നടന്നതെന്ന് വ്യക്തമായിട്ടില്ലെന്നും ഇരയായ പെണ്‍കുട്ടിയില്‍ നിന്ന് മൊഴിയെടുക്കുമെന്നും പറഞ്ഞ പോലീസ് മുഴുവന്‍ പ്രതികളെയും ഉടന്‍ പിടികൂടുമെന്നും അറിയിച്ചു.
