നാടിന് പൊതു ശല്യമായി മാറിയ സ്ത്രീക്കെതിരേ പരാതി കൊടുത്ത് മടുത്ത് നാട്ടുകാര്‍. മുരിക്കാശേരി പെരിയാര്‍വാലി ചപ്പാത്തിലെ വ്യവഹാരിയായ സ്ത്രീയും കൂട്ടാളികളുമാണ് പരാതി നല്‍കി പണം തട്ടാന്‍ ശ്രമം നടത്തുന്നത്.
പെരിയാര്‍വാലിയെ വീടുകളിലെത്തി പുരുഷന്മാരെ തുണി പൊക്കി കാണിക്കുകയും ഇതിനെതിരേ പ്രതികരിക്കുമ്പോള്‍ അത് വീഡിയോയില്‍ പകര്‍ത്തി പോലീസില്‍ പരാതി നല്‍കുമെന്ന് പറഞ്ഞ് ഭീഷണിപ്പെടുത്തി പരാതി നല്‍കുകയുമാണ് ഈ സംഘത്തിന്റെ ലക്ഷ്യം.
പഞ്ചായത്ത് മെംബര്‍ അടക്കം 20ഓളം പേര്‍ ഇവര്‍ക്കെതിരേ മുരിക്കാശേരി പോലീസില്‍ അടക്കം പരാതി നല്‍കിയെങ്കിലും കാര്യമായ നടപടിയൊന്നും ഇതുവരെ ഉണ്ടായിട്ടില്ല.
കഴിഞ്ഞ ദിവസം മാധ്യമപ്രവര്‍ത്തകനായ യുവാവിന്റെ വീട്ടിലെത്തി സമാന രീതിയിലുള്ള പ്രശ്നങ്ങള്‍ ഇവര്‍ സൃഷ്ടിച്ചിരുന്നു.
മാധ്യമപ്രവര്‍ത്തകന്റെ ജോലി തടസപ്പെടുത്തുകയും പീഡന കേസില്‍ കുടുക്കുമെന്ന് ഭീഷണിപ്പെടുത്തുകയും ചെയ്തിരുന്നു.
യാതൊരു ക്രമസമാധാന പ്രശ്നങ്ങളുമില്ലാതിരുന്ന ഈ പ്രദേശത്ത് ഇപ്പോള്‍ പോലീസ് ദിനംപ്രതി കയറിയിറങ്ങുകയാണ്.
ഈ ശല്യക്കാരിയായ സ്ത്രീയുടെ ഉപദ്രവം സഹിക്കവയ്യാതെ പലരും സ്ഥലംവിറ്റ് പോകാനുള്ള തയാറെടുപ്പിലാണ്. നാലോളം വീട്ടുകാര്‍ താമസം വാടക വീടുകളിലേക്ക് മാറി.
ഈ സ്ത്രീക്ക് പിന്നില്‍ പണം തട്ടുന്ന ഒരു സംഘം ഉണ്ടെന്നാണ് സൂചന. പലരില്‍ നിന്നും ഭീഷണിപ്പെടുത്തി പണം വാങ്ങിയിരുന്നതായും സൂചനയുണ്ട്.
ഈ സ്ത്രീക്കെതിരേ പെരിയാര്‍വാലി, കളരിത്തണ്ട് പ്രദേശങ്ങളിലെ സ്ത്രീകള്‍ വനിതാ കമ്മീഷനില്‍ അടക്കം പരാതി നല്‍കിയെങ്കിലും ഇതുവരെ യാതൊരു നടപടിയും ഉണ്ടായില്ലെന്ന ആരോപണവും ശക്തമാണ്.
ഇവര്‍ക്കെതിരേ മുഖ്യമന്ത്രി, ഡിജിപി, വനിതാ കമ്മീഷന്‍ എന്നിവര്‍ക്ക് പരാതി നല്‍കാനുള്ള ഒരുക്കത്തിലാണ് നാട്ടുകാര്‍.
