പെർത്ത്: ഇസ്രയേൽ-പലസ്തീൻ പ്രശ്നത്തിൽ പലസ്തീന് പിന്തുണയറിയിച്ച് ’എല്ലാ ജീവനും തുല്യമാണ്’ എന്നെഴുതിയ ഷൂ ധരിച്ച് കളത്തിലെത്താനുള്ള ഉസ്മാൻ ഖ്വാജയുടെ നീക്കം വിഫലമായി.
ഇന്ന് ആരംഭിക്കുന്ന പാക്കിസ്ഥാനെതിരായ ഒന്നാം ടെസ്റ്റിലായിരുന്നു ഓസ്ട്രേലിയൻ ക്രിക്കറ്റർ ഉസ്മാൻ ഖ്വാജ പ്രത്യേക സന്ദേശം ആലേഖനം ചെയ്ത ഷൂ അണിയാനിരുന്നത്.
ഐസിസി നിയമപ്രകാരം കളിക്കാർ വ്യക്തിപരമായ അഭിപ്രായങ്ങൾ കളത്തിൽ പ്രതിനിധാനം ചെയ്യരുത് എന്നുണ്ട്. ഇക്കാരണത്താലാണ് പ്രത്യേക ഷൂ ധരിക്കുന്നതിൽനിന്ന് ഖ്വാജ പിൻവാങ്ങിയത്.
ഓസ്ട്രേലിയൻ ടീമിന്‍റെ പരിശീലനത്തിൽ ഖ്വാജ ധരിച്ച പ്രത്യേക സന്ദേശമുള്ള ഷൂ പാക്കിസ്ഥാനെതിരായ മത്സരത്തിൽ ഉണ്ടാകില്ലെന്ന് ഓസീസ് ക്യാപ്റ്റൻ പാറ്റ് കമ്മിൻസും അറിയിച്ചു. ഓസ്ട്രേലിയൻ ടീമിൽ എത്തുന്ന ആദ്യ മുസ്‌ലിം മതവിശ്വാസിയാണ് ഓപ്പണിംഗ് ബാറ്ററായ ഖ്വാജ.
