കായംകുളം : ജില്ലയിലെ ആറാട്ടുപുഴ പഞ്ചായത്തിനെയും കൊല്ലം ജില്ലയിലെ ആലപ്പാടിനെയും തമ്മിൽ ബന്ധിപ്പിച്ച് കായംകുളം കായലിനു കുറുകെ നിർമ്മിക്കുന്ന സംസ്ഥാനത്തെ തന്നെ ഏറ്റവും വലിയ ആർച്ച് പാലമായ വലിയഴീക്കൽ പാലത്തിന്റെ നിർമ്മാണ പ്രവൃത്തികൾ പുരോഗമിക്കുന്നു.
കോവിഡിനെ തുടർന്ന് മന്ദഗതിയിലായ പാലത്തിന്റെ നിർമ്മാണ പ്രവർത്തികൾ വീണ്ടും പഴയ ഊർജ്ജത്തോടെ ഇപ്പോൾ പുരോഗമിക്കുകയാണ് .
ഒരു നാടിന്റെ തന്നെ കാത്തിരുപ്പിന്‍റെ പ്രതീകമായ പാലത്തിന്റെ നിർമ്മാണ പ്രവർത്തികൾ പൂർത്തിയാകുന്നതോടെ വലിയഴീക്കലിൽ നിന്ന് അഴീക്കൽ എത്തുന്നതിന് 28 കിലോമീറ്ററോളം ദൂരം ലാഭിക്കുവാൻ സാധിക്കും.
വലിയ മത്സ്യബന്ധന യാനങ്ങൾക്കും പാലത്തിനടിയിലൂടെ സുഖമമായി കടന്നു പോകാവുന്ന രീതിയിലാണ് പാലത്തിന്റെ നിർമ്മാണം. സെൻട്രൽ സ്പാനിന്റെയും അറ്റാച്ച്മെന്റ് റോഡിന്റെയും പ്രവർത്തികളാണ് ഇനി പൂർത്തിയാകാനുള്ളത്.
ഇതിൽ തന്നെ അറ്റാച്ച്മെന്റ് റോഡിനായുള്ള സ്ഥലമെറ്റെടുപ്പ് പൊതുമരാമത്ത് മന്ത്രി ജി സുധാകരൻ ഇടപെട്ട് വേഗത്തിൽ പൂർത്തീകരിക്കുകയായിരുന്നു .2016 ഫെബ്രുവരിയിൽ ഭരണാനുമതി ലഭിച്ച പാലത്തിന്റെ നിർമാണ പ്രവർത്തികൾ 2016 മാർച്ച്‌ 4 ന് ആരംഭിക്കുകയായിരുന്നു .
976 മീറ്റർ നീളത്തിൽ 140 കോടി രൂപ വിനിയോഗിച്ച് 29 സ്പാനുകളോടെയാണ് പാലം നിർമ്മാണം പുരോഗമിക്കുന്നത്. ഇതിൽ 110 മീറ്ററിന്റെ ബോസ്ട്രിങ് ആർച്ച് മാതൃകയിലുള്ള 3 സ്പാനുകൾ കായലിനു കുറുകെയാണ്.
ദക്ഷിണേന്ത്യ യിലെ തന്നെ ഏറ്റവും നീളം കൂടിയ ബോസ്ട്രിങ് ആർച്ചാണ് പാലത്തിന്റെ പ്രധാന ആകർഷണങ്ങളിൽ ഒന്ന്. കൂടാതെ 37 മീറ്റർ നീളമുള്ള 13 സ്പാനുകളും 12 മീറ്റർ നീളമുള്ള 13 സ്പാനുകളും ഉൾപ്പെടെയാണ് പാലം നിർമ്മിക്കുന്നത്.
നിലവിൽപാലത്തിന്റെ 75 ശതമാനത്തോളം പ്രവർത്തികൾ പൂർത്തീകരിച്ചിട്ടുണ്ടെന്നും രണ്ടുമാസത്തിനുള്ളിൽ പാലം ഗതാഗതത്തിന് പൂർണ സജ്ജമാക്കാൻ സാധിക്കുമെന്നാണ് കരുതുന്നതെന്ന് പി ഡബ്ലിയു ഡി ബ്രിഡ്ജസ് വിഭാഗം പറഞ്ഞു .
സുനാമി ദുരന്തം തകർത്തെറിഞ്ഞ രണ്ടു ഗ്രാമങ്ങളാണ് ആലപ്പാട് പഞ്ചായത്തിലെ അഴീക്കലും ആറാട്ടുപുഴ പഞ്ചായത്തിലെ വലിയഴീക്കലും,പാലം യാഥാർഥ്യ മാകുന്നതോടെ രണ്ടു ഗ്രാമങ്ങളും വികസനകുതിപ്പിലെത്തും.കായംകുളം കായലിനും അഴിമുഖത്തിനും കുറുകെ ഒന്നര കിലേമീറ്ററോളം ദൈർഘ്യ മുള്ളതാണ് പുതിയ പാലം.
നിർമ്മാണം പൂർത്തിയാകുമ്പോൾ കേരളത്തിലെ ഏറ്റവും വലിയ ആർച്ച് പാലമായി ഇത് മാറും.പാലത്തിന് മുകളിൽ നിന്ന് സൂര്യോദയവും അസ്തമയവും കാണാൻ പ്രത്യേക സംവിധാനവും ഒരുക്കുന്നുണ്ട്.കൂടാതെ സമീപത്തായി ലൈറ്റ് ഹൗസും നിർമ്മിക്കുന്നുണ്ട്.
