തിരുവനന്തപുരം: അന്താരാഷ്ട്ര വനിതാദിനത്തിന്‍റെ ഭാഗമായി ചരിത്രത്തിലാദ്യമായി കേരളത്തിൽ ഒരു ട്രെയിൻ പൂർണമായും വനിതകൾ ഓടിക്കുകയാണെന്ന് ആരോഗ്യ മന്ത്രി കെ.കെ. ശൈലജ. എട്ടിനു രാവിലെ 10.15ന് എറണാകുളത്ത് നിന്നും പുറപ്പെടുന്ന വേണാട് എക്സ്പ്രസാണ് വനിതകൾ ഓടിക്കുന്നത്.
ലോക്കോ പൈലറ്റ്, അസി. ലോക്കോ പൈലറ്റ്, പോയിന്റ്സ്മെൻ, ഗേറ്റ് കീപ്പർ, ട്രാക്ക് വിമൻ എന്നിവരെല്ലാവരും വനിതകളായിരിക്കും. ടിക്കറ്റ് ബുക്കിംഗ് ഓഫീസ്, ഇൻഫർമേഷൻ സെന്‍റർ, സിഗ്നൽ, കാരേജ്, വാഗണ്‍ എന്നീ വിഭാഗങ്ങളും നിയന്ത്രിക്കുക വനിതകളാണ്.
മാത്രമല്ല റെയിൽവേ പ്രൊട്ടക്ഷൻ ഫോഴ്സിലെ വനിത ഉദ്യോഗസ്ഥരായിക്കും സുരക്ഷയൊരുക്കുന്നത്. സതേണ്‍ റെയിൽവേ തിരുവനന്തപുരമാണ് ഈ ദൗത്യത്തിന് നേതൃത്വം നൽകുന്നത്.
തിരുവനന്തപുരത്തു നിന്നും ഷൊർണൂറിലേക്ക് പോകുന്ന 16302 നന്പർ വേണാട് എക്സ്പ്രസാണ് എറണാകുളം മുതൽ വനിതകൾ സർവ നിയന്ത്രണവും ഏറ്റെടുക്കുന്നത്. രാവിലെ 10.15ന് എറണാകുളം സൗത്തിൽനിന്നും പുറപ്പെടുന്ന ട്രയിനിലെ വനിത ജീവനക്കാർക്ക് റെയിൽവേ സ്വീകരണവും ഒരുക്കിയിട്ടുണ്ട്.
ടി.പി. ഗൊറോത്തി ഈ ട്രെയിനിന്‍റെ ലോക്കോ പൈലറ്റും വിദ്യാദാസ് അസിസ്റ്റന്‍റ് ലോക്കോ പൈലറ്റുമായിരിക്കും. ഗാർഡായി എം. ഷീജ, ടിടിഇ ആയി ഗീതാകുമാരി, പ്ലാറ്റ്ഫോം എസ്എം ആയി ദിവ്യ, ക്യാബിൻ എസ്എം ആയി നീതു, പോയിൻറ്സ്മെൻ ആയി പ്രസീദ, രജനി, മെക്കാനിക്കൽ സ്റ്റാഫ് ആയി സിന്ധു വിശ്വനാഥൻ, വി.ആർ. വീണ, എ.കെ. ജയലക്ഷ്മി, സൂര്യ കമലാസനൻ, ടി.കെ. വിനീത, ശാലിനി രാജു, അർച്ചന എന്നിവരും ഈ ട്രെയിനിൽ സേവനമനുഷ്ഠിക്കും.
