കോഴിക്കോട്: വട്ടിയൂർക്കാവിൽ ആർഎസ്എസ് എൽഡിഎഫിനു വോട്ടുമറിച്ചെന്നു കോണ്ഗ്രസ് നേതാവ് കെ. മുരളീധരൻ. വട്ടിയൂർക്കാവിൽ സിപിഎം ജാതി പറഞ്ഞ് വോട്ടു പിടിച്ചെന്നും എൻഎസ്എസിനെ എതിർക്കാൻ സിപിഎം ആർഎസ്എസിനെ കൂട്ടുപിടിച്ചെന്നും വട്ടിയൂർക്കാവ് തോൽവിക്കു പിന്നാലെ മാധ്യമങ്ങളോടു സംസാരിക്കവെ മുരളി കുറ്റപ്പെടുത്തി. മുരളീധരൻ എംപിയായ ഒഴിവിലാണു വട്ടിയൂർക്കാവിൽ തെരഞ്ഞെടുപ്പ് നടന്നത്.
വട്ടിയൂർക്കാവിൽ സിപിഎം ജാതി പറഞ്ഞ് വോട്ടു പിടിച്ചതിന് തന്‍റെ പക്കൽ തെളിവുകളുണ്ട്. ഇപ്പോൾ അതു പുറത്തുവിടുന്നില്ല. മന്ത്രി കടകംപള്ളി സുരേന്ദ്രൻ നേരിട്ടാണ് അതു ചെയ്തത്. എൻഎസ്എസിനെ എതിർക്കാൻ ആർഎസ്എസിനെ കൂട്ടുപിടിക്കുകയാണ് സിപിഎം ചെയ്തത്. ആർഎസ്എസ് വോട്ടുകൾ എൽഡിഎഫിലേക്കു മറിച്ചിട്ടുണ്ടെന്നും മുരളീധരൻ ആരോപിച്ചു.
പ്രളയകാലത്ത് റസിഡൻസ് അസോസിയേഷനുകൾ ശേഖരിച്ചു നൽകിയ സാധനങ്ങൾ കൊടി വീശി കയറ്റിയയക്കുകയല്ലാതെ പ്രശാന്ത് ഒന്നും ചെയ്തില്ല. ഉപതെരഞ്ഞെടുപ്പ് മുന്നിൽക്കണ്ട് പ്രശാന്തിനെ മേയർ ബ്രോ ആയി അവതരിപ്പിക്കുകയായിരുന്നു.
എംഎൽഎമാരെ രാജിവയ്പിച്ച് എംപിമാരാക്കിയത് ജനങ്ങൾക്ക് ഇഷ്ടമായിട്ടില്ലെന്നും മുരളീധരൻ കുറ്റപ്പെടുത്തി. കണ്ണിലെ കൃഷ്ണമണി പോലെ എട്ട് വർഷം പരിപാലിച്ച തന്‍റെ മണ്ഡലമാണ് വട്ടിയൂർക്കാവ്. ആ മണ്ഡലമാണു യുഡിഎഫിനു നഷ്ടമായത്. അതിൽ ഏറ്റവും ദുഃഖിതൻ താനാണെന്നും മുരളീധരൻ പറഞ്ഞു.
വട്ടിയൂർക്കാവിൽ 14,465 വോട്ടിന്റെ ഭൂരിപക്ഷത്തിലാണു സിപിഎമ്മിലെ വി.കെ. പ്രശാന്ത് കോണ്ഗ്രസിലെ കെ. മോഹൻകുമാറിനെ പരാജയപ്പെടുത്തിയത്. തിരുവനന്തപുരം നോർത്ത് നിയമസഭാ മണ്ഡലം വട്ടിയൂർക്കാവ് നിയമസഭാ മണ്ഡലമായി മാറിയതിനു ശേഷം ആദ്യമായാണ് ഇടതു മുന്നണി ഇവിടെ വിജയം സ്വന്തമാക്കിയത്.
2011 ൽ മണ്ഡലം നഷ്ടപ്പെടുന്പോൾ 35.84 ശതമാനമായിരുന്ന ഇടതുമുന്നണിയുടെ വോട്ടുവിഹിതം ക്രമേണ കുറഞ്ഞ് കഴിഞ്ഞ ലോക്സഭാ തെരഞ്ഞെടുപ്പ് ആയപ്പോഴേക്കും 21.69 ശതമാനത്തിലെത്തിയിരുന്നു. അവിടെ നിന്നാണ് വി.കെ പ്രശാന്തിലൂടെ 44.24 ശതമാനം വോട്ടുവിഹിതവും 14,465 വോട്ടിന്റെ ഭൂരിപക്ഷവും സ്വന്തമാക്കി ഇടതുമുന്നണി ഈ ഉപതെരഞ്ഞെടുപ്പിൽ മണ്ഡലത്തിൽ കുതിച്ചുകയറിയത്.
വട്ടിയൂർക്കാവ് മണ്ഡലം നിലവിൽ വന്നതിനുശേഷം നടന്ന 2011 ലെയും 2016 ലെയും നിയമസഭാ തെരഞ്ഞെടുപ്പുകളിൽ കെ. മുരളീധരനാണ് ഇവിടെ വിജയിച്ചത്. സമുദായ സമവാക്യങ്ങൾ പരിഗണിക്കാതെ പ്രശാന്തിനെ സ്ഥാനാർഥിയാക്കാനുള്ള മുന്നണി നേതൃത്വത്തിന്‍റെ തീരുമാനം ശരിവയ്ക്കുന്നതായി തെരഞ്ഞെടുപ്പു ഫലം.
മാത്രമല്ല, സ്ഥാനാർഥി നിർണയവുമായി ബന്ധപ്പെട്ട് കോണ്ഗ്രസിൽ തുടക്കത്തിൽ തന്നെ കല്ലുകടിയുണ്ടായിരുന്നു. എൻ. പീതാംബരക്കുറുപ്പിനെ സ്ഥാനാർഥിയാക്കണമെന്ന് കെ. മുരളീധരൻ പാർട്ടി നേതൃത്വത്തോട് ആവശ്യപ്പെട്ടെങ്കിലും അതിനെതിരേ എതിർപ്പ് ഉയർന്നതിനേത്തുടർന്നാണു മോഹൻകുമാറിനു സ്ഥാനാർഥിത്വം ലഭിച്ചത്. പാർട്ടിയിൽനിന്നു പിന്തുണ വേണ്ടത്ര കിട്ടുന്നില്ലെന്ന് ഒരു ഘട്ടത്തിൽ മോഹൻകുമാർ തന്നെ പരാതിപ്പെട്ടിരുന്നു.
