മോഹൻലാലും ലാൽജോസും ആദ്യമായി ഒന്നിക്കുന്ന വെളിപാടിന്‍റെ പുസ്തകം ഓണത്തിനെത്തുന്നു. മോഹൻലാലാണ് ഇക്കാര്യം ഫേസ്ബുക്കിലൂടെ അറിയിച്ചത്. സംവിധായകൻ ലാൽജോസിനും നിർമാതാവ് ആന്‍റണി പെരുന്പാവൂരിനും ഒപ്പമുള്ള സെൽഫി പോസ്റ്റ് ചെയ്തതിനൊപ്പമാണ് ലാലിന്‍റെ വെളിപാടിന്‍റെ പുസ്തകം ഓണത്തിനു വരവേൽക്കാം എന്ന കുറിപ്പ്. കാന്പസിന്‍റെ പശ്ചാത്തലത്തിൽ അധ്യാപകരും വിദ്യാർഥികളും തമ്മിലുള്ള ബന്ധത്തിന്‍റെ കഥ പറയുന്ന ചിത്രമാണിത്.
പ്രഫ. മൈക്കിൾ ഇടിക്കുള എന്ന കഥാപാത്രമായാണു മോഹൻലാൽ എത്തുന്നത്.പ്രത്യേകതരം സ്വഭാവത്തിന് ഉടമയായ മൈക്കിൾ ഇടിക്കുളയെ ഡ്രാക്കുള എന്നാണ് വിളിക്കുന്നത്. മോഹൻലാലിന്റെ ചിത്രത്തിലെ ഗെറ്റപ്പുകൾ ഇതിനോടകം ശ്രദ്ധിക്കപ്പെട്ടുകഴിഞ്ഞു.അന്ന രേഷ്മ രാജനാണ് നായിക. അങ്കമാലി ഡയറീസിലൂടെ ശ്രദ്ധേയയായ നടിയാണ് അന്ന. അങ്കമാലി ഡയറീസ് താരം ശരത് കുമാറും അരുണ്‍ കുര്യനും പ്രധാന വേഷത്തിലെത്തുന്നു. ബെന്നി പി. നായരന്പലമാണ് ചിത്രത്തിന്‍റെ തിരക്കഥയൊരുക്കിയിരിക്കുന്നത്.
