നെടുമങ്ങാട് : കിടങ്ങുമ്മൽ ആരോഗ്യ സബ് സെന്‍ററിന്‍റെ ശിലാഫലകം അടിച്ചു തകർത്ത ജില്ലാ പഞ്ചായത്ത് അംഗം വെള്ളനാട് ശശിക്കെതിരെ പോലീസ് കേസെ ടുത്തു.
കഴിഞ്ഞ 11ന് ഗ്രാമപഞ്ചായത്ത് പ്രസിഡന്‍റ് കെ.എസ്.രാജലക്ഷ്മി ഉദ്ഘാടനം ചെയ്ത ആരോഗ്യ സബ് സെന്‍ററിന്‍റെ ശിലാഫലകമാണ് ജില്ലാ പഞ്ചായത്ത് അംഗവും വെള്ളനാട് ഗ്രാമപഞ്ചായത്ത് മുൻ പ്രസിഡൻറുമായ വെള്ളനാട് ശശി അടിച്ചു തകർത്തത്.
ശിലാഫലകത്തിൽ പേരില്ല, ഉദ്ഘാടന ചടങ്ങിന് ക്ഷണിച്ചില്ല തുടങ്ങിയ കാരണങ്ങൾ പറഞ്ഞാണ് ശിലാഫലകം തകർത്തത്.
കഴിഞ്ഞ ഭരണ സമിതിയുടെ കാലത്താണ് ആരോഗ്യ സബ്സെന്‍ററിന്‍റെ നിർമാണ പ്രവർത്തനങ്ങൾ തുടങ്ങിയത്.
ഭരണ സമിതിയുടെ കലാവധി കഴിയാറായപ്പോൾ കെട്ടിടത്തിന്‍റെ പണി മുക്കാൽ ഭാഗമേ പൂർത്തിയായിരുന്നുള്ളു. എന്നാൽ കഴിഞ്ഞ പഞ്ചായത്ത് തെരഞ്ഞെടുപ്പിന് മുന്നോടിയായി ഈ സ്ഥാപനം അടൂർ പ്രകാശ് എംപി ഉദ്ഘാടനം ചെയ്തതായി പ്രഖ്യാപിച്ച് പ്രസിഡന്‍റിന്‍റെ നേതൃത്വത്തിൽ ശിലാഫലകം സ്ഥാപിച്ചു.
എന്നാൽ ഔദ്യോഗികമായി ഉദ്ഘാടനമൊന്നും നടത്തിയതുമില്ല.പുതിയ ഭരണസമിതി അധികാരത്തിലെത്തിയപ്പോൾ സബ് സെന്‍ററിന്‍റെ പണി പൂർത്തിയാക്കി പ്രവർത്തനോദ്ഘാടനത്തിന്‍റെ പുതിയ ശിലാഫലകം സ്ഥാപിച്ച് ഉദ്ഘാടനം ചെയ്തു.
പണി പൂർത്തിയാക്കാതെ നേരത്തെ സ്ഥാപിച്ച ശിലാഫലകം തറക്കല്ലിടൽ ചടങ്ങിന്‍റേതാക്കി മാറ്റി. പുതിയ ശിലാഫലകത്തിൽ ജില്ലാ പഞ്ചായത്ത് അംഗത്തിന്‍റെ പേര് ചേർക്കുകയോ ഉദ്ഘാ ടനത്തിന് ക്ഷണിക്കുകയോ ചെയ്തില്ല.
പ്രചാരണങ്ങളോ മറ്റു പരസ്യങ്ങളോ ഒന്നുമില്ലാതെ വളരെ ലളിതമായി നടത്തിയ ചടങ്ങ് ആയതിനാലാണ് ജില്ലാ പഞ്ചായത്ത് അംഗത്തെ ക്ഷണിക്കാത്തതെന്ന് പഞ്ചായത്ത് ഭാരവാഹികൾ പറഞ്ഞു.
സബ് സെന്‍ററിൽ അതിക്രമിച്ചു കയറി ശിലാഫലകം തകർത്ത വെള്ളനാട് ശശിക്കെതിരെ പഞ്ചായത്ത് സെക്രട്ടറി ഹേമലത, കിടങ്ങുമ്മൽ വാർഡ് അംഗം ശോഭൻകുമാർ എന്നിവർ ആര്യനാട് പോലീസിന്‌ പരാതി നൽകി.
പരാതിയെ തുടർന്ന് പോലീസ് കേസെടുത്തു. ജില്ലാ പഞ്ചായത്ത് അംഗത്തിനെതിരെ സിപിഎമ്മും ബിജെപിയും പ്രതിഷേധത്തിലാണ്.
