മുളങ്കുന്നത്തുകാവ്: സന്‍മനസുള്ളവര്‍ക്കു സമാധാനം എന്ന സിനിമയില്‍ ശ്രീനിവാസന്‍ പറയും പോലെ ഈ കാക്കിക്കുപ്പായത്തിനുള്ളില്‍ ഒരു ഹൃദയമുണ്ട്…ഒരു കലാകാരന്‍റെ ഹൃദയം…മുളങ്കുന്നത്തുകാവ് സ്വദേശിയും സ്പെഷല്‍ ബ്രാഞ്ചിലെ എഎസ്ഐയുമായ വിനോദിന്‍റെ കാക്കിക്കുപ്പായത്തിനുള്ളിലെ കലാഹൃദയത്തെ ആദരിക്കാന്‍ മുളങ്കുന്നത്തുകാവ് ഭരണിവേല കമ്മിറ്റിയാണ് നേതൃത്വം കൊടുത്തത്.
രക്ഷാധികാരി വി.ജി.ശങ്കരനാരായണന്‍, പ്രസിഡന്‍റ് ജയന്‍ കോഞ്ചേരി, സെക്രട്ടറി എം.അച്യുതന്‍, വരടിയാട്ടില്‍ കേശവന്‍, കെ.സുനില്‍കുമാര്‍, കെ.കെ.സുനില്‍കുമാര്‍ എന്നിവര്‍ ആദരണചടങ്ങിനു നേതൃത്വം നല്‍കി.സ്കൂള്‍കലാമേളകളില്‍ നാടകങ്ങള്‍ രചിച്ച് നാടകപ്രേമികളുടെ മനസില്‍ ഇടംനേടിയ കലാകാരനാണ് വിനോദ്.
ജില്ലാ യുവജനോത്സവത്തില്‍ യുപി, ഹൈസ്കൂള്‍ വിഭാഗം മലയാള നാടകത്തില്‍ വിനോദിന്‍റെ രചനകളാണ് സമ്മാനാര്‍ഹമായത്. തൃശൂരിലെ മാത്രമല്ല തിരുവനന്തപുരം, ആലപ്പുഴ, കാസര്‍ഗോഡ് ജില്ലകളിലെ കലാമേളകളിലെല്ലാം വിനോദിന്‍റെ തൂലിക അരങ്ങിലെത്തിച്ച നാടകങ്ങള്‍ സമ്മാനം നേടിയിരുന്നു. കേരളത്തിലെമ്പാടും നിരവധി ശിഷ്യഗണങ്ങളും ഈ പോലീസുകാരനു നാടകവേദിയിലുണ്ട്.
