ജയ്പുര്‍: മദ്യലഹരിയില്‍ റീല്‍ ചിത്രീകരിക്കാന്‍ റെയില്‍വേ ട്രാക്കിലൂടെ വാഹനമോടിച്ച യുവാവ് അറസ്റ്റിൽ. രാജസ്ഥാനിലെ ജയ്പുരിലാണു സംഭവം.
മഹീന്ദ്ര ഥാര്‍ എസ്‌യുവിയാണ് യുവാവ് റെയില്‍വേ ട്രാക്കിൽ കയറ്റിയത്. ഉടന്‍ പാളത്തിലൂടെ ഒരു ചരക്കു ട്രെയിൻ വന്നതിനാൽ വാഹനം പൂര്‍ണമായി ട്രാക്കിന് മുകളില്‍ കയറ്റാന്‍ ഡ്രൈവര്‍ക്കു സാധിച്ചില്ല. ഇതോടെ എസ്‌യുവി റെയില്‍വേ ട്രാക്കുകള്‍ക്കിടയില്‍പ്പെട്ടുപോയി.
വാഹനം കണ്ട ലോക്കോ പൈലറ്റ് ട്രെയിന്‍ പെട്ടെന്നു നിർത്തിയതിനാൽ വലിയ ദുരന്തം ഒഴിവായി. തടിച്ചുകൂടിയ ആളുകള്‍ ചേര്‍ന്ന് വാഹനം ട്രാക്കിനു പുറത്തെത്തിക്കാന്‍ ശ്രമിച്ചു. 15 മിനിറ്റോളം നീണ്ട പ്രയത്‌നത്തിനൊടുവിലാണു വാഹനം ട്രാക്കില്‍നിന്നു പുറത്തെത്തിച്ചത്.
ഇതിനു പിന്നാലെ ഡ്രൈവര്‍ വാഹനം വേഗത്തില്‍ ഓടിച്ചു കടന്നുകളഞ്ഞു. രക്ഷപ്പെടാനുള്ള ശ്രമത്തിനിടെ ഏതാനും പേരെ വാഹനം തട്ടിയിടുകയും ചെയ്തു. പോലീസ് വാഹനത്തെ പിന്തുടര്‍ന്ന് ഡ്രൈവറെ അറസ്റ്റ് ചെയ്യുകയും വാഹനം കസ്റ്റഡിയില്‍ എടുക്കുകയും ചെയ്തു.
