പലരും തങ്ങളുടെ ജൻമദിനാഘോഷങ്ങളുടെ വീഡിയോ സമൂഹമാധ്യമങ്ങളിൽ പങ്കുവയ്ക്കാറുള്ളതാണ്. വീട്ടിലോ അതുമല്ലങ്കിൽ ഏതെങ്കിലും ഹോട്ടലുകളിലോ അല്ലങ്കിൽ ഓപ്പൺസ്പേയ്‌സോ ഒക്കെ ആഘോഷങ്ങൾക്കായി തെരഞ്ഞെടുക്കാറുണ്ട്. എന്നാൽ ആകാശത്ത് നിന്നൊരു ആഘോഷമായാലോ? വിമാനത്തിനുള്ളിൽ ആണെന്ന് തെറ്റിദ്ധരിക്കേണ്ട. ഇത് പറന്ന് പറന്ന് നടന്നൊരാഘോഷമാണ്.
പാകിസ്ഥാൻ ഗായികയും സോഷ്യൽ മീഡിയ ഇൻഫ്ലുവൻസറുമായ റബേക്ക ഖാന്‍റെ ജന്മദിനാഘോഷ വീഡിയോ ആണിപ്പോൾ സോഷ്യൽ മീഡിയയിൽ വൈറലാകുന്നത്. ഓറഞ്ച് ഗൗൺ ധരിച്ച് ഓറഞ്ച് ബലൂണിനാൽ പാറിപ്പറക്കുകയാണ് യുവതി. എന്തായാലും ഇതിന്‍റെ ചിത്രങ്ങൾ പെട്ടന്ന് വൈറലായി.
‘കൗമാരത്തിന് വിട, ഇനി ഇരുപതാം വയസിലേക്ക്, സാഹസികതകൾ ആരംഭിക്കട്ടെ,’ എന്ന അടിക്കുറിപ്പോടെയായിരുന്നു റബീക്ക ജന്മദിനാഘോഷ വീഡിയോകളും ചിത്രങ്ങളും തന്‍റെ ഇൻസ്റ്റഗ്രാമിൽ പങ്കുവച്ചത്.
ചിത്രങ്ങൾ വൈറലായതോടെ നിരവധി ആളുകളാണ് കമന്‍റുമായി എത്തിയത്. ഇത് വെറും എഡിറ്റിംഗ് മാത്രമാണ്. ഇങ്ങനെയൊന്നും പറക്കാൻ സാധ്യമല്ല എന്നൊരു കൂട്ടർ പറഞ്ഞപ്പോൾ, ഇത് സ്കൈ ഡൈവിംഗ് പോലെ എന്തോ ഒന്നാണെന്ന് മറ്റൊരു കൂട്ടരും അഭിപ്രായപ്പെട്ടു. എന്നാൽ എല്ലാവരുടേയും സംശയം തീർത്തുകൊണ്ട് യുവതി തന്നെ രംഗത്തെത്തിയിരിക്കുകയാണ്.
ജന്മദിനം വ്യത്യസ്തമായി ആഘോഷിക്കണമെന്ന ചിന്തയിലാണ് ഇത്തരത്തിലൊരു ആശയം ഉണ്ടായതെന്ന് റബീക്ക പറഞ്ഞു. ക്രയിനിന്‍റെ സഹായത്തോടെയാണ് റബീക്ക പറന്നുയർന്നത്. എല്ലാ സുരക്ഷാമാനദണ്ഡങ്ങളും പാലിച്ചാണ് തന്‍റെ ഫോട്ടോഷൂട്ടെന്നും യുവതി വ്യക്തമാക്കി.
