കോഴിക്കോട്: ദേശീയ സീനിയര്‍ വോളി ചാമ്പ്യന്‍ഷിപ്പില്‍ ചരിത്രമാവര്‍ത്തിച്ചു കേരളാ ടീമുകള്‍. പുരുഷവിഭാഗത്തില്‍ നിലവിലുള്ള ചാമ്പ്യന്‍മാരായ കേരളം കിരീടം നിലനിർത്തിയപ്പോൾ വനിതകൾക്ക് സ്വന്തംമണ്ണിലും ചരിത്രം തിരുത്താനായില്ല. കലാശപ്പോരാട്ടത്തിൽ റെയിൽവേസ് തീര്‍ത്ത ഉരുക്കുപാളത്തിൽത്തട്ടി പത്താം തവണയും അവർക്ക് കിരീടം നഷ്ടമായി.
ഒന്നിനെതിരേ മൂന്നു സെറ്റുകള്‍ക്കു റെയില്‍വേസിനെ അടിയറവു പറയിച്ചാണ് പുരുഷവിഭാഗം കിരീടത്തിൽ കേരളം മുത്തമിട്ടത്. സ്‌കോര്‍: 26-24, 23-25, 19-25, 21-25. 2016-ല് ചെന്നൈയില്‍ നടന്ന ചാമ്പ്യന്‍ഷിപ്പിന്‍റെ കലാശപ്പോരാട്ടത്തിലും റെയില്‍വേസിനെ പരാജയപ്പെടുത്തിയാണ് കേരളം ചാമ്പ്യന്മാരായത്.
അതേസമയം, വനിതാ വിഭാഗത്തില്‍ തുടര്‍ച്ചയായ പത്താം തവണയും കേരളം ഫൈനലിൽ തോൽവി സമ്മതിച്ചു. ആദ്യസെറ്റ് നഷ്ടമായെങ്കിലും രണ്ടും മൂന്നും സെറ്റ് വിജയിച്ചു കയറിയ വനിതകള്‍ക്ക് പിന്നീടുള്ള രണ്ടു സെറ്റുകളിലും റെയിൽവേക്കു മുന്നിൽ കാലിടറി. സ്‌കോര്‍: 25-21, 28-26, 25-21, 25-18, 15-12. 2007-ല് ജയ്പൂരിലെ ചാമ്പ്യന്‍ഷിപ്പിലായിരുന്നു പെണ്‍പടയുടെ അവസാന ചാമ്പ്യന്‍ഷിപ്പ് നേട്ടം. തിരുവനന്തപുരത്ത് 1973ല് നടന്ന ദേശീയ സീനിയര്‍ വോളിയിലെ കിരീടം മാത്രമാണ് നാട്ടിലെ ചാമ്പ്യന്‍ഷിപ്പുകളിലെ നേട്ടം.
പതിനേഴ് വര്‍ഷത്തെ ഇടവേളയ്ക്കുശേഷം കോഴിക്കോടിന്‍റെ മണ്ണില്‍ വിരുന്നെത്തിയ ദേശീയ വോളി ചാമ്പ്യന്‍ഷിപ്പില്‍ ഒരിക്കല്‍പോലും തോല്‍വി അറിയാതെയാണു പുരുഷ ടീം ഫൈനലില്‍ എത്തിയത്. വോളി ചരിത്രത്തിലാദ്യമായി മലയാളിയല്ലാത്ത ഒരാള്‍ നയിച്ച് കിരീടം ചൂടിയതും ഇത്തവണത്തെ ദേശീയ വോളി മത്സരത്തിന്‍റെ സവിശേഷതയാണ്.
തമിഴ്‌നാട് തഞ്ചാവൂര്‍ സ്വദേശിയായ ജെറോം വിനീതായിരുന്നു കേരളത്തിന്‍റെ ക്യാപ്റ്റന്‍. ഇതിനു മുമ്പ് കോഴിക്കോട്ട് അരങ്ങേറിയ 2001-ലെ ചാമ്പ്യന്‍ഷിപ്പില്‍ ബിജോ തോമസിന്‍റെ നേതൃത്വത്തില്‍ ഇറങ്ങിയ കേരള പുരുഷ ടീമിനായിരുന്നു കിരീടം. 1997, 2012, 2013, 2016 എന്നീ വര്‍ഷങ്ങളില്‍ ദേശീയ ചാമ്പ്യന്‍ഷിപ്പിൽ പുരുഷടീം കിരീടം അണിഞ്ഞിട്ടുണ്ട്.
തിങ്ങിനിറഞ്ഞ ആരാധകര്‍ക്കു മുമ്പില്‍ ആവേശകരമായ മത്സരമായിരുന്നു പുരുഷവിഭാഗം കാഴ്ചവച്ചത്. ക്യാപ്റ്റന്‍ ജെറോം വിനീതും യുവതാരം അജിത്‌ലാലും മികച്ച പ്രകടനം കാഴ്ചവച്ചതോടെ റെയില്‍വേസിന്‍റെ അന്താരാഷ്‌ട്രതാരം എസ്. പ്രഭാകരനും മലയാളിയായ ക്യാപ്റ്റന്‍ മനു ജോസഫും അടങ്ങുന്ന സംഘം കീഴടങ്ങുകയായിരുന്നു. പ്രഭാകരന്‍റെയും മനുജോസഫിന്‍റെയും മികച്ച പ്രകടനമായിരുന്നു ആദ്യസെറ്റില്‍ റെയിൽവേക്ക് വിജയം നൽകിയത്.
പോയിന്‍റ് ഏഴിലും 24-ലും ഒപ്പമെത്താന്‍ കേരളത്തിനു കഴിഞ്ഞെങ്കിലും മനു ജോസഫ് രണ്ടു സെര്‍വ് പോയിന്‍റുകളടക്കം ആറ് ഫിനിഷിംഗും പ്രഭാകരന്‍ നാല് ഫിനിഷിംഗും നടത്തി 26-24ന് സെറ്റ് നേടുകയായിരുന്നു. മുന്‍ മത്സരങ്ങളില്‍ എതിര്‍ ടീമിന്‍റെ സ്മാഷുകള്‍ നിരന്തരം പ്രതിരോധിച്ച അഖിലിന്‍റെ കൈകള്‍ ആദ്യ സെറ്റില്‍ പല തവണ ചോര്‍ന്നത് കേരളത്തെ പ്രതികൂലമായി ബാധിച്ചു. ആദ്യ സെറ്റ് അവസാന നിമിഷം കൈവിട്ടുപോയെങ്കിലും ഇഞ്ചോടിഞ്ച് പൊരുതിനിന്ന കേരളത്തിന്‍റെ ആത്മവിശ്വാസത്തെ അത് തീരെ ബാധിച്ചില്ല.
വനിതാ വിഭാഗത്തിൽ റെയില്‍വേയുടെ സീനിയര്‍ താരങ്ങളായ നിര്‍മല്‍, പ്രിയങ്കബോറ, എം.എസ്. പൂര്‍ണിമ, മിനിമോള്‍ ഏബ്രഹാം എന്നിവര്‍ മികച്ച ഫോമിലായത് കേരളത്തിന്‍റെ പരാജയത്തിനു വേഗം കൂട്ടി. നിര്‍മലിന്‍റെ ഫിനിഷിംഗിനു മുന്നില്‍ കേരളം ഓരോ സെറ്റിലും പതറുന്നതാണ് കണ്ടത്.
