നെടുമ്പാശേരി: വ്യാജ ബ്രാൻഡഡ് സിഗരറ്റുകളുടെ വൻ ശേഖരം പിടികൂടി. കസ്റ്റംസ് പ്രിവന്‍റീവ് വിഭാഗം ഉദ്യോഗസ്ഥരാണ് ഇന്ന് രാവിലെ നടത്തിയ പരിശോധനയിൽ കാഞ്ഞൂരിൽനിന്നും ലക്ഷങ്ങളുടെ വ്യാജ ബ്രാൻഡഡ് സിഗരറ്റ് ശേഖരം പിടികൂടിയത്.
രഹസ്യ വിവരം ലഭിച്ചതിന്‍റെ അടിസ്ഥാനത്തിലാണ് കസ്റ്റംസ് ഉദ്യോഗസ്ഥർ പരിശോധനയ്ക്കെത്തിയത്.ഉദ്യോഗസ്ഥർ എത്തിയതോടെ ഇവിടെ ഉണ്ടായിരുന്ന രണ്ടുപേർ ഓടി രക്ഷപ്പെട്ടു. ഇവരെ പിടികൂടാനുള്ള ശ്രമം തുടരുകയാണ്.
ഇതിനായി പൊലിസിന്‍റെ സഹായവും തേടിയിട്ടുണ്ട്. രാജ്യാന്തര ബ്രാൻഡുകളിലുള്ള സിഗരറ്റുകളുടെ വ്യാജ ശേഖരമാണ് പിടികൂടിയിരിക്കുന്നത്.
ഇവ വ്യാജമായി ഇവിടെ തന്നെ നിർമിച്ചതാണോ അതോ അനധികൃതമായി വിദേശത്തുനിന്നും എത്തിച്ചതാണോയെന്നും പരിശോധിച്ചു വരികയാണ്. പിടികൂടിയ സിഗരറ്റ് ശേഖരത്തിന്‍റെ മൂല്യം കണക്കാക്കാനായിട്ടില്ല.
