വയനാടിന് കൈത്താങ്ങായി ഒരു ദിവസത്തെ വരുമാനം മാറ്റിവച്ച് സ്വകാര്യ ബസുകള്‍. കോട്ടയം-ചങ്ങനാശേരി, കോട്ടയം-ഞാലിയാകുഴി, കോട്ടയം-കുമരകം റൂട്ടുകളില്‍ സര്‍വീസ് നടത്തുന്ന മൂഴിപ്പാറ ട്രാവല്‍സിന്‍റെ ഏഴു ബസുകളുടെ ഇന്നലത്തെ സര്‍വീസാണു വയനാടിനു കൈത്താങ്ങായി സർവീസ് നടത്തിയത്.
ദുരന്തഭൂമിയിലെ ഉള്ളുലയ്ക്കുന്ന കാഴ്ചകള്‍ കണ്ട ബസുടമയായ കൊച്ചുമോന്‍, മൂഴിപ്പാറ ബസിലെ ജീവനക്കാരുടെ മുന്പിൽ ഈ ആശയം അവതരിപ്പിക്കുകയായിരുന്നു. പൂര്‍ണമനസോടെ ഉടമയുടെ നിര്‍ദ്ദേശം അംഗീകരിച്ച 14 ജീവനക്കാര്‍ തങ്ങളുടെ ഒരുദിവസത്തെ ശമ്പളം വേണ്ടെന്നുവച്ചു.
ടിക്കറ്റ് ഒഴിവാക്കി പ്രത്യേക കളക്ഷന്‍ ബക്കറ്റുകളിലാണ് ബസുകളില്‍ യാത്ര ചെയ്തവര്‍ നല്‍കിയ തുക സ്വീകരിച്ചത്. വയനാടിനൊരു കൈത്താങ്ങ് എന്ന് നാമകരണം ചെയ്ത യാത്രയിലൂടെ ലഭിച്ച തുക കോട്ടയം ജില്ലാ കളക്‌ടര്‍ക്കു കൈമാറും.
