കായംകുളം : കരിപ്പുഴ തോട്ടിൽ ചാടി ജീവനൊടുക്കാൻ ശ്രമിച്ച യുവതിയെ മാധ്യമ പ്രവർത്തകൻ രക്ഷിച്ചു. സി ഡി നെറ്റ് പ്രാദേശിക ചാനലിന്‍റെ ന്യൂസ് കാമറാമാൻ ഷെജിരാജ് ആണ് തോട്ടിലേക്ക് ചാടിയ യുവതിയെ സാഹസികമായി രക്ഷപ്പെടുത്തിയത്.
ഇന്നലെ വൈകുന്നേരമായിരുന്നു സംഭവം. നൂറനാട് പടനിലം സ്വദേശിനിയായ യുവതി കുടുംബ പ്രശ്നങ്ങളെ തുടർന്ന് കായംകുളം മാർക്കറ്റ് ഭാഗത്ത് എത്തുകയും കരിപ്പുഴ തോട്ടില്ലേക്ക് ചാടുകയുമായിരുന്നു. ഈ സമയം തോടിനോട് ചേർന്ന റോഡുമായി ബന്ധപ്പെട്ട വാർത്തയ്ക്കായി ദൃശ്യങ്ങൾ ചിത്രികരി ക്കുകയായിരുന്ന ഷെജിരാജ് ഇതു കാണുകയും പെട്ടെന്നു തന്നെ തോട്ടിലേക്ക് എടുത്ത് ചാടി ഒഴുക്കിൽപ്പെട്ട യുവതിയെ രക്ഷ പ്പെടുത്തുകയുമായിരുന്നു.
മാതാവിനും ബന്ധുക്കൾക്കുമൊത്ത് ഓട്ടോറിക്ഷയിലെത്തിയ യുവതി ഓട്ടോയിൽ നിന്നിറങ്ങി ഓടി തോട്ടിലേക്ക് എടുത്ത് ചാടുകയായിരുന്നു. മാലിന്യം നിറഞ്ഞ തോട്ടിൽ ഈ സമയം നല്ല ഒഴുക്കായിരുന്നു. നിലയില്ലാതോട്ടിലേക്ക്് ചാടിയ ഷെജിരാജ് ഏറെ ആയാസപ്പെട്ടാണ് യുവതിയെ രക്ഷപ്പെടുത്തിയത്. രക്ഷാപ്രവർത്തനത്തിനിടെ ഷെജരാജിന്‍റെ വിവാഹമോതിരവും പണമടങ്ങിയ പഴ്സും നഷ്ടപ്പെട്ടു.
കരയ്ക്കെത്തിച്ച യുവതിയെ നാട്ടുകാരും ബന്ധുക്കളും ചേർന്ന് കായംകുളം താലൂക്കാശുപത്രിയിൽ പ്രവേശിപ്പിച്ചു. സാഹസികമായും സമയോചിതമായും ഇടപെട്ട് യുവതിയുടെ ജീവൻ രക്ഷിച്ച ഷെജിരാജിനെ നാട്ടുകാരും കായംകുളം എസ് ഐ രാജൻബാബുവും അഭിനന്ദിച്ചു
