ആത്മഹത്യചെയ്ത യുവാവിന്‍റെ ശവപ്പെട്ടിക്കു മുകളിൽ “ഭാര്യയുടെ പീഡനമാണു മരണത്തിനു കാരണം’ എന്നെഴുതി വച്ച് ബന്ധുക്കൾ മൃതദേഹം സംസ്കരിച്ചു. കർണാടകയിലെ ഹുബ്ബള്ളിയിൽ പീറ്റർ എന്ന യുവാവിന്‍റെ സംസ്കാരമാണ് ഇത്തരത്തിൽ നടത്തിയത്. യുവാവിന്‍റെ ആത്മഹത്യാകുറിപ്പ് പ്രകാരമാണ് ഇത്തരത്തിൽ ശവപ്പെട്ടിക്കു മുകളിൽ എഴുതിവച്ചതെന്നു ബന്ധുക്കൾ പറയുന്നു.
പീറ്റർ തന്‍റെ അച്ഛനെഴുതിയ ആത്മഹത്യാകുറിപ്പിലെ വാക്കുകൾ ഇങ്ങനെ: “അച്ഛാ, ക്ഷമിക്കണം. എന്‍റെ ഭാര്യ എന്നെ കൊല്ലുകയാണ്, അവൾ എന്‍റെ മരണം ആഗ്രഹിക്കുന്നു… ഭാര്യയുടെ പീഡനം കാരണം ഞാൻ മരിക്കുകയാണ്’. ഇക്കാര്യം ശവപ്പെട്ടിയുടെ പുറത്ത് എഴുതിവയ്ക്കണമെന്നും ആത്മഹത്യാകുറിപ്പിൽ ഉണ്ടായിരുന്നു.
രണ്ടുവർഷം മുന്പാണു പീറ്റർ വിവാഹിതനായത്. ഇരുവരും തമ്മിലുണ്ടായ ചില പ്രശ്നങ്ങളെത്തുടർന്നു കഴിഞ്ഞ മൂന്നു മാസമായി ദന്പതികൾ പിരിഞ്ഞു താമസിക്കുകയായിരുന്നു. ഇവരുടെ വിവാഹമോചനക്കേസ് കോടതിയുടെ പരിഗണനയിലാണ്. വിവാഹമോചനക്കേസിൽ 20 ലക്ഷം രൂപ യുവതി നഷ്ടപരിഹാരം ആവശ്യപ്പെട്ടതിനെത്തുടർന്നു പീറ്റർ കടുത്ത സമ്മർദത്തിലായിരുന്നു. ഭാര്യയുമായുണ്ടായ വഴക്കിനെത്തുടർന്നു പീറ്ററിനു ജോലി നഷ്ടപ്പെട്ടതായും ബന്ധുക്കൾ പറയുന്നു.
