യുവതിയെ വീട്ടില്‍ കയറി കുത്തിപ്പരിക്കേല്‍പ്പിച്ച മുന്‍ കാമുകന്‍ പിടിയില്‍. കുഞ്ഞിത്തൈ എരുമേലി ആഷിഖിനെയാണ് (25) പോലീസ് അറസ്റ്റ് ചെയ്തത്.
പറവൂര്‍ വടക്കേക്കരയില്‍ ഞായറാഴ്ച ഉച്ചക്ക് രണ്ടു മണിയോടെയാണ് സംഭവമുണ്ടായത്. യുവതിയുടെ കൈക്കാണ് കുത്തേറ്റത്. പരിക്ക് ഗുരുതരമല്ല. യുവതിയുടെ അമ്മയേയും ആഷിഖ് കയ്യേറ്റം ചെയ്തു
മുമ്പ് ആഷിഖുമായി യുവതി പ്രണയത്തിലായിരുന്നു. എന്നാല്‍ ആഷിഖിനെക്കുറിച്ച് കൂടുതല്‍ മനസ്സിലാക്കിയ യുവതി ഇയാളുമായുള്ള ബന്ധം അവസാനിപ്പിക്കുകയായിരുന്നു.
പിന്നീട് തര്‍ക്കമുണ്ടായപ്പോള്‍ ഇരു വീട്ടുകാരെയും സ്റ്റേഷനില്‍ വിളിച്ചുവരുത്തി പ്രശ്‌നം പരിഹരിച്ചിരുന്നു.
എന്നാല്‍ ഞായറാഴ്ച യുവതിയും അമ്മയും മാത്രം വീട്ടില്‍ ഉണ്ടായിരുന്ന സമയത്ത് യുവാവ് അച്ഛനെയും കൂട്ടിയെത്തി സംസാരിക്കുകയായിരുന്നു.
ഒന്നും രണ്ടും പറഞ്ഞ് തര്‍ക്കമായതോടെ ആഷിഖ് കത്തിയെടുത്ത് യുവതിയെ കുത്തുകയായിരുന്നു. കൈയില്‍ കുത്തേറ്റതിനെത്തുടര്‍ന്ന് യുവതിയെ ആശുപത്രിയില്‍ പ്രവേശിപ്പിച്ച് ആറ് തുന്നലുകള്‍ ഇട്ടു.
യുവാവിന്റെ വടികൊണ്ടുള്ള അടിയില്‍ യുവതിയുടെ അമ്മയുടെ തലക്കും പരിക്കേറ്റു. കുത്തുന്നത് തടയാന്‍ ശ്രമിച്ചപ്പോഴായിരുന്നു മര്‍ദനം.
