ലോകത്തെ ആകമാനം ബാധിച്ചിരിക്കുന്ന മഹാമാരി കോവിഡ് 19നെതിരേ സകല ശക്തിയുമെടുത്ത് ലോക ജനത പോരാടുമ്പോള്‍ ഇതിനു വിഘാതമാവുന്ന പ്രവൃത്തികളുമായി ഒരു കൂട്ടം ആളുകളും ഇറങ്ങിയിട്ടുണ്ട്.
1.37 ലക്ഷം രൂപ വിലവരുന്ന പലചരക്ക് പച്ചക്കറി സാധനങ്ങളില്‍ നക്കിയ കാലിഫോര്‍ണിയ സ്വദേശിനിയാണ് ഇതിന് ഏറ്റവും ഒടുവിലത്തെ ഉദാഹരണം.
ഇവരെ പോലീസ് അറസ്റ്റ് ചെയ്തു. ബുധനാഴ്ച വടക്കന്‍ കാലിഫോര്‍ണിയയിലെ സേഫ് സ്റ്റോറിലാണ് സംഭവം ഉണ്ടായത്.
ഉപഭോക്താവ് സാധനങ്ങളില്‍ നക്കുന്നു എന്ന് പരാതി പറഞ്ഞ് സേഫ് വേ സ്റ്റോറില്‍ നിന്ന് പോലീസിന് ഫോണ്‍ വിളി എത്തുകയായിരുന്നു. തുടര്‍ന്ന് ഉടന്‍ തന്നെ പോലീസ് സ്ഥലത്ത് എത്തി.
ഉപഭോക്താവ് സൂപ്പര്‍മാര്‍ക്കറ്റിലെ ഫാന്‍സി ആഭരണങ്ങള്‍ കയ്യില്‍ അണിഞ്ഞെന്നും ആഭരണങ്ങള്‍ നക്കിയെന്നും സ്റ്റോറിലെ ജീവനക്കാരന്‍ പോലീസിനെ അറിയിച്ചു.
മാത്രവുമല്ല വാങ്ങാന്‍ ഉദ്ദേശമില്ലാത്ത സാധനങ്ങളും തന്റെ കാര്‍ട്ടില്‍ നിറയെ ശേഖരിച്ചതിനാല്‍ അവയും കടയുടമയ്ക്ക് നശിപ്പിക്കേണ്ടതായി വന്നു.
പോലീസ് എത്തുമ്പോള്‍ പ്രതിയായ സ്ത്രീ കടയില്‍ ഉണ്ടായിരുന്നു. ഇവര്‍ 53കാരിയായ ജെന്നിഫര്‍ വാക്കര്‍ എന്ന സ്ത്രീയാണെന്ന് തിരിച്ചറിഞ്ഞിട്ടുണ്ട്.
‘വാങ്ങാന്‍ യാതൊരു ഉദ്ദേശവുമില്ലാത്ത മാംസവും മദ്യവുമെല്ലാം അവര്‍ കാര്‍ട്ടില്‍ ശേഖരിച്ചിരുന്നു. പണമില്ലാത്തതിനാല്‍ ഇവ വാങ്ങാനും ഇവര്‍ തയ്യാറായില്ല’, പോലീസ് പറയുന്നു.
ഇവര്‍ ശേഖരിക്കുകും സ്പര്‍ശിക്കുകയും ചെയ്ത ഉത്പന്നങ്ങളത്രയും കടയുടമകള്‍ പിന്നീട് നശിപ്പിച്ചു. 1.36 ലക്ഷത്തോളം വിലവരുന്ന സാധനങ്ങളാണിവ.
മറ്റുള്ള പലചരക്കു കടകളില്‍ നിന്ന് വ്യത്യസ്തമായി വിനോദസഞ്ചാരികളെ ആകര്‍ഷിക്കാന്‍ ആഭരണങ്ങള്‍ ഇവിടെ വില്‍ക്കാറുണ്ട്
. ഇതാണ് ഇപ്പോള്‍ കടയുടമയ്ക്ക് വിനയായിരിക്കുന്നത്. നാല് ലക്ഷത്തിലധികം ആളുകളാണ് അമേരിക്കയില്‍ ഇതുവരെ കോവിഡ് ബാധിതരായത്.
15000ത്തോളം ആളുകള്‍ മരിക്കുകയും ചെയ്തു. ഈ സാഹചര്യത്തില്‍ ഈ സ്ത്രീയുടെ പ്രവൃത്തിയെ അതീവ ഗൗരവത്തോടെയാണ് പോലീസ് കാണുന്നത്.
