ടോക്കിയോ: എട്ടാമത് വനിതാ ഹോക്കി ജൂണിയർ ഏഷ്യ കപ്പ് കിരീടം ഇന്ത്യക്ക്. ഇന്ത്യയുടെ കന്നിക്കിരീടമാണ്. ഫൈനലിൽ ഇന്ത്യ 2-1ന് ദക്ഷിണകൊറിയയെ കീഴടക്കി.
ടൂർണമെന്‍റ് ചരിത്രത്തിൽ ഇന്ത്യയുടെ രണ്ടാമത് ഫൈനലായിരുന്നു. 2012ൽ ഫൈനലിൽ പ്രവേശിച്ചെങ്കിലും കിരീടത്തിൽ മുത്തംവയ്ക്കാൻ ഇന്ത്യക്കു സാധിച്ചില്ല.
ഫൈനലിന്‍റെ 22-ാം മിനിറ്റിൽ അന്നുവിലൂടെ ഇന്ത്യ ലീഡ് നേടി. എന്നാൽ, 25-ാം മിനിറ്റിൽ പാർക്ക് സിയോ യെൻ ദക്ഷിണകൊറിയയ്ക്കു സമനില സമ്മാനിച്ചു.
വിജയത്തിനായി ആക്രമിച്ചു കളിച്ച ഇന്ത്യക്കുവേണ്ടി 41-ാം മിനിറ്റിൽ നീലം ലക്ഷ്യം കണ്ടു. അതോടെ 2-1ന്‍റെ ജയം കുറിച്ച് ഇന്ത്യ കപ്പിൽ മുത്തംവച്ചു.
ഒന്പതു ഗോൾ നേടിയ ഇന്ത്യയുടെ അന്നുവാണു ടൂർണമെന്‍റിലെ ടോപ് സ്കോറർ. ജൂണിയർ പുരുഷ വിഭാഗത്തിലും ഇന്ത്യയാണ് ചാന്പ്യൻ.
