കോട്ടയം: അർധരാത്രിയിൽ നഗരത്തിൽ യുവതിക്കു നേരേ ആക്രമണം നടത്തിയ ആൾക്കെതിരേ കോട്ടയം വെസ്റ്റ് പോലീസ് കേസ് രജിസ്റ്റർ ചെയ്തു. മുണ്ടക്കയം സ്വദേശിക്കെതിരെയാണ് കേസ്.
ഇന്നലെ രാത്രി 12ന് കെഎസ്ആർടിസി സ്റ്റാൻഡിനു സമീപത്തെ തട്ടുകടയിലാണ് സംഭവം. സംക്രാന്തിയിലെ വിവാഹത്തിൽ പങ്കെടുത്തശേഷം തിരികെ മടങ്ങുകയായിരുന്നു തൊടുപുഴ സ്വദേശികളായ കുടുംബം തട്ടുകടയിലെത്തി ഭക്ഷണം കഴിച്ചു.
തുടർന്നു വീട്ടമ്മ തൊട്ടടുത്തുള്ള കടയിലെത്തി കുപ്പിവെള്ളം വാങ്ങുന്നതിനിടയിലാണ് ഇയാൾ ആക്രമിക്കാൻ ശ്രമിച്ചത്. കുതറിയോടിയ വീട്ടമ്മ മറ്റൊരു കടയ്ക്കുള്ളിൽ കയറി രക്ഷപ്പെടുകയായിരുന്നു.
അക്രമി പിന്നാലെ എത്തിയെങ്കിലും പ്രദേശത്തുണ്ടായിരുന്ന നാട്ടുകാരും ഓട്ടോറിക്ഷ ഡ്രൈവർമാരും ചേർന്നു ഇയാളെ പിടികൂടി.
കൈയിലുണ്ടായിരുന്ന തുണിയിൽ കല്ലുകെട്ടിയശേഷം അക്രമി എല്ലാവരെയും ആക്രമിക്കാനും ശ്രമിച്ചു.
ഇതോടെ ഓട്ടോറിക്ഷ ഡ്രൈവർമാർ ഉൾപ്പെടെ കൂടുതൽ ആളുകൾ എത്തി ഇയാളെ കീഴടക്കുകയായിരുന്നു. തുടർന്ന് വെസ്റ്റ് പോലീസിനെ വിളിച്ചുവരുത്തി കൈമാറുകയായിരുന്നു.
