മുംബൈ: ഇംഗ്ലണ്ടിലും വെയ്ൽസിലുമായി നടക്കുന്ന ഏകദിന ലോകകപ്പ് ക്രിക്കറ്റിനുള്ള ഇന്ത്യൻ ടീമിനെ ഈ മാസം 15ന് പ്രഖ്യാപിക്കുമെന്ന് ബിസിസിഐ അറിയിച്ചു. മുംബൈയിലെ ബിസിസിഐ ആസ്ഥാനത്ത് വച്ച് അഞ്ച് അംഗ സെലക്‌ഷൻ കമ്മിറ്റി ടീം പ്രഖ്യാപനം നടത്തും.
മേയ് 30നാണ് ലോകകപ്പ് ക്രിക്കറ്റിന് തുടക്കം കുറിക്കുക. ലോകകപ്പിൽ പങ്കെടുക്കുന്ന ടീമുകൾ അന്തിമ സംഘത്തെ ഏപ്രിൽ 23നുള്ളിൽ പ്രഖ്യാപിക്കേണ്ടതുണ്ട്. എങ്കിലും ലോകകപ്പിന് ഏഴ് ദിവസം മുന്പ് വരെ അന്തിമ സംഘത്തിൽ അഴിച്ചുപണി നടത്താവുന്നതാണ്.
മുംബൈയിൽ നടക്കുന്ന സെലക്‌ഷൻ കമ്മിറ്റി യോഗത്തിന് ശേഷമാണ് ടീം പ്രഖ്യാപനം. ക്യാപ്റ്റൻ വിരാട് കോഹ്ലി അടക്കമുള്ളവർ സെലക്‌ഷൻ കമ്മിറ്റി യോഗത്തിൽ പങ്കെടുക്കുമെന്നാണ് സൂചന.
ജൂണ്‍ അഞ്ചിന് ദക്ഷിണാഫ്രിക്കയ്ക്കെതിരേയാണ് ഇന്ത്യയുടെ ആദ്യ മത്സരം. ജൂണ്‍ ഒന്പതിന് ഓസ്ട്രേലിയയുമായും 13ന് ന്യൂസിലൻഡുമായും ഏറ്റുമുട്ടും. ജൂണ്‍ 16ന് മാഞ്ചെസ്റ്ററിലെ ഓൾഡ് ട്രാഫോർഡിൽ ഇന്ത്യയുടെ പാക്കിസ്ഥാനും കൊന്പുകോർക്കും.
