അമ്പരപ്പിക്കുന്ന വിചിത്രമായ റിക്കാർഡുകളെ കുറിച്ച് നമ്മൾ പലപ്പോഴും കേൾക്കാറുണ്ട്. അത്തരത്തിലുള്ള ഒരു റിക്കാർഡാണ് സോഷ്യൽ മീഡിയയിൽ ഇപ്പോൾ ചർച്ചയാകുന്നത്.
ലോകത്തിലെ ഏറ്റവും ഉയരം കുറഞ്ഞ ദമ്പതികൾ എന്ന പ്രത്യേകതയോടെ ഗിന്നസ് വേൾഡ് റെക്കോർഡിൽ ഇടം നേടിയിരിക്കുകയാണ് പൗലോ ഗബ്രിയേൽ ഡ സിൽവ ബറോസും കട്യുസിയ ലി ഹോഷിനോയും.
തങ്ങളുടെ ഉയരക്കുറവ് ഒരു പോരായ്മയായി കാണാതെ അവർ അതിനെ പ്രയോജനപ്പെടുത്തി. സോഷ്യൽ മീഡിയ ഇപ്പോൾ ദമ്പതികളുടെ പ്രണയകഥ കേട്ട് അമ്പരന്നിരിക്കുകയാണ്.
ബ്രസീലിൽ നിന്നുള്ള പൗലോ ഗബ്രിയേൽ ഡ സിൽവ ബറോസും കട്യുസിയ ലി ഹോഷിനോയും ആദ്യമായി ഓൺലൈനിൽ കണ്ടുമുട്ടുന്നത് 2006-ലാണ്. 15 വർഷത്തിലേറെയായി അവർ ബന്ധത്തിലായിരുന്നു. പൗലോയ്ക്ക് ഇപ്പോൾ പ്രായം 31 ഉം കറ്റ്യൂസിയയ്ക്ക് 28 ഉം ആണ്.
വിവാഹത്തിന് ശേഷം, ദമ്പതികൾ ഭൂമിയിലെ ഏറ്റവും ഉയരം കുറഞ്ഞ ദമ്പതികളായി മാറി. ഈ പുതിയ അപ്‌ഡേറ്റ് ഗിന്നസ് വേൾഡ് റിക്കാർഡിന്‍റെ ഔദ്യോഗിക ഇൻസ്റ്റാഗ്രാം പേജിൽ പങ്കിട്ടിട്ടുണ്ട്. പോസ്റ്റ് വളരെ പെട്ടെന്ന് തന്നെ വൈറലായി.
ഒരുമിച്ച് ജീവിക്കുന്നതിൽ അതീവ സന്തോഷമുണ്ടെന്നും ജീവിതത്തിലെ എല്ലാ വെല്ലുവിളികളും ഒരുമിച്ച് നേരിടാൻ തയ്യാറാണെന്നും ദമ്പതികൾ പറഞ്ഞു. പോസ്റ്റ് അനുസരിച്ച്, പൗലോയുടെ ഉയരം 90.28 സെൻ്റീമീറ്ററും (35.54 ഇഞ്ച്) കട്യുസിയയുടെ ഉയരം 91.13 സെൻ്റീമീറ്ററും (35.88 ഇഞ്ച്) ആണ്.
നിരവധിപേർ നവദമ്പതികൾക്ക് ആശംസകളുമായി രംഗത്തെത്തി.’നിങ്ങൾ രണ്ടുപേർക്കും അഭിനന്ദനങ്ങൾ! എല്ലാ ആശംസകളും! മികച്ച ദാമ്പത്യ ജീവിതം മുന്നോട്ട് പോകട്ടെ, “രണ്ട് ആളുകളുടെ പ്രണയത്തിന്‍റെ ഉത്തമ ഉദാഹരണം! അഭിനന്ദനങ്ങൾ സുഹൃത്തുക്കളെ എന്നിങ്ങനെ പോകുന്നു പോസ്റ്റിന് ലഭിച്ച കമന്‍റുകൾ. 79 ആയിരത്തിലധികം പേരാണ് പോസ്റ്റ് ഇതിനോടകം ലൈക്ക് ചെയ്തത്.
