ജയ്പൂര്‍: ഇന്ത്യന്‍ യുവശാസ്ത്രജ്ഞന്‍ ഇനി അമേരിക്കന്‍ സേനയ്ക്കായി യുദ്ധവിമാനങ്ങള്‍ നിര്‍മിക്കും. ജയ്പൂര്‍ സ്വദേശിയായ മൊണാര്‍ക്ക് ശര്‍മയ്ക്കാണ് ഈ അസുലഭ ഭാഗ്യം ലഭിച്ചിരിക്കുന്നത്. യുഎസ് സൈന്യത്തിന്റെ എഎച്ച്-64ഇ കോംപാറ്റ് ഫൈറ്റര്‍ ഹെലികോപ്ടര്‍ യൂണിറ്റില്‍ ശാസ്ത്രജ്ഞനായി നിയമനം ലഭിച്ച ശര്‍മയ്ക്ക് 1.20 കോടി രൂപയാണ് പ്രതിവര്‍ഷ വേതനമായി ലഭിക്കുന്നത്.2013ല്‍ നാസയുടെ (NASA) മാസ് കമ്മ്യൂണിക്കേഷന്‍ വിങ്ങില്‍ ജൂനിയര്‍ റിസേര്‍ച്ച് അസിസ്റ്റന്റായാണ് മൊണാര്‍ക് ശര്‍മ കരിയര്‍ ആരംഭിക്കുന്നത്. 2011ല്‍ നാസയുടെ മൂണ്‍ ബാഗി പ്രൊജക്ടില്‍ ഇദ്ദേഹം നയിച്ച ടീമായിരുന്നു ഒന്നാമതെത്തിയത്.
മൊണാര്‍ക്ക് ശര്‍മ യുഎസ് സേനയിലെത്തുന്നത് 2016ലാണ്. മികവു തുടര്‍ന്ന ശര്‍മ ആര്‍മി സര്‍വീസ് മെഡലും സേഫ്റ്റി എക്സലന്‍സ് അവാര്‍ഡും കരസ്ഥമാക്കുകയും ചെയ്തു. ഈ മികവു തന്നെയാണ് ശര്‍മയെ സൈന്യത്തിന്റെ വിമാന നിര്‍മാണ യൂണിറ്റില്‍ എത്തിച്ചതും. വിമാനങ്ങളുടെ രൂപകല്‍പന, നിര്‍മാണം, പരിശോധന, അറ്റകുറ്റപ്പണികള്‍ തുടങ്ങിയവയെല്ലാം ശര്‍മയുടെ ഡ്യൂട്ടിയില്‍ പെടും. രാജസ്ഥാന്‍ പോലീസില്‍ അഡീഷണല്‍ പ്രൈവറ്റ് സെക്രട്ടറിയായ രാകേഷ് ശര്‍മയാണ് മൊണാര്‍ക്കിന്റെ അച്ഛന്‍. ജയ്പൂര്‍ നാഷണല്‍ യൂണിവേഴ്‌സിറ്റിയില്‍ നിന്നാണ് മൊണാര്‍ക്ക് ശര്‍മ ഇലക് ട്രോണിക് ആന്‍ഡ് കമ്മ്യൂണിക്കേഷനില്‍ ബിരുദം നേടിയത്.
