തിരുവനന്തപുരം: നെയ്യാറ്റിൻകരയിൽ കുടിയൊഴിപ്പിക്കലിനിടെ മരിച്ച ദന്പതികളുടെ മക്കൾക്കു വീടും സ്ഥലവും നൽകുമെന്നു യൂത്ത് കോണ്ഗ്രസ് സംസ്ഥാന പ്രസിഡന്‍റ് ഷാഫി പറന്പിൽ.
ഉറ്റവർ ജീവനോടെയിരിക്കുന്പോൾ കുട്ടികളെ സഹായിക്കാൻ ആർക്കും സാധിച്ചില്ലെന്നും സ്ഥലത്തിന്‍റെയും വീടിന്‍റെയും ഉത്തരവാദിത്തം യൂത്ത് കോണ്ഗ്രസ് ഏറ്റെടുക്കുകയാണെന്നും ഷാഫി പറന്പിൽ ഫേസ്ബുക് പോസ്റ്റിൽ അറിയിച്ചു.
കോടതി ഉത്തരവ് നടപ്പിലാക്കാനെത്തിയ അഡ്വക്കേറ്റ് കമ്മീഷന്‍റെയും പോലീസിന്റെയും മുന്നിൽ പെട്രോൾ ദേഹത്തൊഴിച്ച് ആത്മഹത്യയ്ക്ക് ശ്രമിച്ച് ചികിത്സയിലിരിക്കവെയാണ് അതിയന്നൂർ പോങ്ങിൽ സ്വദേശി രാജൻ (47), ഭാര്യ അന്പിളി (36) എന്നിവർ മരിച്ചത്.
തിരുവനന്തപുരം മെഡിക്കൽ കോളജ് ആശുപത്രിയിൽ ചികിത്സയിലായിരുന്നു ഇരുവരും. രാജൻ തിങ്കളാഴ്ച പുലർച്ചയാണു മരിച്ചത്. വൈകിട്ട് രാജന്‍റെ മൃതദേഹം സംസ്കരിക്കുന്ന സമയത്താണ് അന്പിളി മരിച്ച വാർത്തയും എത്തുന്നത്.
ആത്മഹത്യക്കുറ്റത്തിന് രാജനും ഭാര്യ അന്പിളിക്കുമെതിരെ നെയ്യാറ്റിൻകര പോലീസ് കേസെടുത്തിരുന്നു. സ്വകാര്യ വ്യക്തിയുടെ പുരയിടത്തിൽ കുടിൽ കെട്ടി കുടുംബത്തോടൊപ്പം താമസിക്കുന്ന രാജൻ അവിടം ഒഴിയണമെന്ന കോടതി വിധി നടപ്പാക്കാനാണ് അഡ്വക്കറ്റ് കമ്മീഷൻ പോലീസുമായി ഇക്കഴിഞ്ഞ 22-ന് സ്ഥലത്തെത്തിയത്.
ഇതിനിടെ രാജൻ വീടിനകത്തു കയറി പെട്രോളുമായി പുറത്തെത്തി അന്പിളിയെയും ചേർത്ത് നിർത്തി ദേഹത്തൊഴിച്ച് തീ കൊളുത്തുകയായിരുന്നുവെന്ന് പോലീസ് പറഞ്ഞു. രക്ഷിക്കാനുള്ള ശ്രമത്തിനിടയിൽ ഗ്രേഡ് എസ്ഐ അനിൽകുമാറിനും പൊള്ളലേറ്റിരുന്നു.
രാജനും കുടുംബവും താമസിച്ചിരുന്ന വീടിനു സമീപത്തു തന്നെ ഇന്നലെ സംസ്കാര ചടങ്ങുകളും നടന്നു. സംഭവത്തിനു ശേഷം മിനിറ്റുകൾക്കകം സ്റ്റേ ഓർഡർ എത്തിയെങ്കിലും രാജനെയും അന്പിളിയെയും ഗുരുതരാവസ്ഥയിൽ ആശുപത്രിയിലേക്കു കൊണ്ടുപോയിരുന്നു.
അതേ സമയം, ദേഹത്ത് പെട്രോൾ ഒഴിച്ച് കത്തിക്കുമെന്ന് ഭീഷണിപ്പെടുത്തുക മാത്രമായിരുന്നു രാജൻറെ ഉദ്ദേശ്യമെന്ന് ബന്ധുക്കൾ പറയുന്നു. ലൈറ്റർ തട്ടിത്തെറിപ്പിച്ചത് പോലീസാണെന്നും ആരോപണമുണ്ട്.
സംഭവത്തിൽ ഡിജിപി ലോക്നാഥ് ബെഹ്റ അന്വേഷണത്തിന് ഉത്തരവിട്ടിട്ടുണ്ട്. റൂറൽ എസ്പിക്കാണ് അന്വേഷണ ചുമതല. പരാതിയെത്തുടർന്ന് ഭൂമി ഒഴിപ്പിക്കണമെന്ന് കോടതി ഉത്തരവ് കൈകാര്യം ചെയ്യുന്നതിൽ പോലീസിനു വീഴ്ച പറ്റിയിരുന്നോ എന്നാണ് അന്വേഷിക്കുക. ദന്പതികളോടുപോലീസ് മോശമായി പെരുമാറിയിരുന്നോ എന്നതുൾപ്പെടെ അന്വേഷണവിധേയമാക്കാനും നിർദേശം നൽകി.
