ബംഗളൂരു: ഇന്ത്യൻ മുൻ ക്രിക്കറ്റ് താരം സഹീർ ഖാനും ബോളിവുഡ് നടി സാഗരിക ഗഡ്കെയും വിവാഹിതരായി. വ്യാഴാഴ്ച രാവിലെ പ്രത്യേക വിവാഹ നിയമപ്രകാരമാണ് വിവാഹം നടന്നത്. വിവാഹത്തിന്‍റെ ചിത്രങ്ങൾ ഇരുവരും പുറത്തുവിട്ടു. ഈ മാസം 27ന് മുംബൈ താജ് മഹല്‍ പാലസില്‍ വച്ചാണ് വിവാഹസൽക്കാരം. ക്രിക്കറ്റ് ലോകത്തെ പ്രമുഖരും ബോളിവുഡ് താരങ്ങളുമെല്ലാം വിരുന്നിൽ പങ്കെടുക്കും.
ദീര്‍ഘനാളത്തെ പ്രണയത്തിനുശേഷമാണ് “ചക് ദേ ഇന്ത്യ’ താരം സാഗരികയും സഹീറും വിവാഹ ജീവിതത്തിലേക്ക് കടക്കുന്നത്. കഴിഞ്ഞ ഏപ്രിലിലാണ് ഇരുവരുടേയും വിവാഹനിശ്ചയം കഴിഞ്ഞത്. അതിനുമുന്പ് തന്നെ ഇരുവരും പ്രണയത്തിലാണെന്ന് വാര്‍ത്തകള്‍ വന്നിരുന്നെങ്കിലും സാഗരികയോ സഹീറോ പ്രതികരിച്ചിരുന്നില്ല. എന്നാൽ യുവരാജ് സിംഗിന്‍റെ വിവാഹത്തില്‍ രണ്ടുപേരും ഒന്നിച്ചു പങ്കെടുത്തതോടെ ഇരുവരും പ്രണയത്തിലാണെന്ന കാര്യം ആരാധകര്‍ ഉറപ്പിക്കുകയായിരുന്നു.
ഷാരൂഖ് ഖാന്‍ നായകനായ ചക്‌ദേ ഇന്ത്യ എന്ന ചിത്രത്തിലെ മികച്ച അഭിനയത്തിലൂടെയാണ് സാഗരിക പ്രശസ്തിയിലേക്ക് ഉയരുന്നത്.ഇന്ത്യക്കായി 92 ടെസ്റ്റ് മത്സരങ്ങളും 282 ഏകദിന മത്സരങ്ങളും കളിച്ചിട്ടുള്ള താരമാണ് സഹീര്‍ ഖാൻ. 2011ല്‍ ലോകകപ്പ് നേടിയ ഇന്ത്യന്‍ ടീമിലും സഹീര്‍ അംഗമായിരുന്നു.
