കൊച്ചി: താരസംഘടനയായ “അമ്മ’യുടെ തെരഞ്ഞെടുപ്പില്‍ അട്ടമറി ജയവുമായി മണിയൻപിള്ള രാജു. വൈസ് പ്രസിഡന്‍റ് സ്ഥാനത്തേക്ക് നടന്ന വാശിയേറിയ തെരഞ്ഞെടുപ്പില്‍ പാനലിനു പുറത്തുനിന്നു മല്‍സരിച്ചാണ് മണിയന്‍പിള്ള രാജു അട്ടിമറി വിജയം നേടിയത്.
ഔദ്യോഗിക പാനലില്‍ മല്‍സരിച്ച ആശ ശരത്ത് പരാജയപ്പെട്ടു. അതേസമയം ഔദ്യോഗികപാനലില് ഇതേ സ്ഥാനത്തേക്കു മല്‍സരിച്ച ശ്വേതാമേനോന്‍ വിജയിച്ചു.
ഔദ്യോഗിക പാനലില്‍ മല്‍സരിച്ച ആശ ശരത്, നിവിന്‍ പോളി, ഹണി റോസ് എന്നിവര്‍ക്കു തോൽവി നേരിട്ടു. പതിനൊന്നംഗ എക്സിക്യൂട്ടീവ് കമ്മിറ്റിയിലേക്ക് ബാബുരാജ്, ലാല്‍, ലെന, മഞ്ജുപിള്ള, രചന നാരായണന്‍കുട്ടി, സുധീര്‍ കരമന, സുരഭി ലക്ഷ്മി, ടിനി ടോം, ടൊവിനോ തോമസ്, ഉണ്ണി മുകുന്ദന്‍, വിജയ് ബാബു എന്നിവര്‍ വിജയിച്ചു. പാനലിനു പുറത്തു മത്സരിച്ച നാസര്‍ ലത്തീഫിനും തോല്‍വി നേരിടേണ്ടിവന്നു.
വൈസ് പ്രസിഡന്‍റ്, നിര്‍വാഹക സമിതി എന്നിവയിലേക്കു മാത്രമായിരുന്നു വോട്ടെടുപ്പ്. പ്രസിഡന്‍റായി മോഹന്‍ലാലും ജനറല്‍ സെക്രട്ടറിയായി ഇടവേള ബാബുവും നേരത്തെ എതിരില്ലാതെ തെരഞ്ഞെടുക്കപ്പെട്ടിരുന്നു. ജയസൂര്യ സെക്രട്ടറിയും സിദ്ദിഖ് ട്രഷററുമാണ്.
ഇരുവര്‍ക്കും എതിരാളികളില്ലായിരുന്നു. ഔദ്യോഗിക പാനലിലെ ഒന്‍പത് പേരും ലാലും വിജയ് ബാബുവുമാണ് എക്സിക്യൂട്ടീവ് കമ്മിറ്റിയിലേക്ക് തെരഞ്ഞെടുക്കപ്പെട്ടത്.
