തലശേരി: ചെക്കിംഗ് നടപടികൾ കഴിഞ്ഞ് വിമാനത്തിനുള്ളിലെത്തിയ മലയാളി യുവതി അപ്രതീക്ഷിതമായി വിമാനത്തിനുള്ളിൽനിന്നു പുറത്തേക്ക് ഇറങ്ങി ഓടി. ഇന്നലെ വൈകുന്നേരം 6.30 ഓടെ ദുബായ് വിമാനത്താവളത്തിലെ ടെർമിനൽ രണ്ടിലാണ് നാടകീയവും അപകടകരവുമായ സംഭവങ്ങൾ അരങ്ങേറിയത്. ദുബായിൽനിന്നു കണ്ണൂരിലേക്ക് വരികയായിരുന്ന ഐഎക്സ് 748 ാം നമ്പർ എയർ ഇന്ത്യാ എക്സ്പ്രസ് വിമാനത്തിൽനിന്നാണ് മുപ്പതോളം വയസ് വരുന്ന യുവതി ഗ്രൗണ്ടിലേക്ക് ഇറങ്ങി ഓടിയത്.
ഒറ്റയ്ക്കായിരുന്നു ഇവരുടെ യാത്ര. വിമാനത്തിൽ കയറിയ യുവതി സീറ്റിൽ ഇരിക്കാതെ പൈലറ്റ് ഇരിക്കുന്ന ഭാഗത്തുള്ള വാതിലിനടുത്ത് പോയി നിൽക്കുകയായിരുന്നു. യുവതിയുടെ പെരുമാറ്റത്തിൽ സംശയം തോന്നിയ മലയാളികൾ ഉൾപ്പെടെയുള്ള മൂന്ന് എയർ ഹോസ്റ്റസുമാർ യുവതിക്ക് സമീപം നിലയുറപ്പിച്ചു.
പേടിയാണെന്നും തനിക്ക് യാത്ര ചെയ്യേണ്ടെന്നും അച്ഛനെ കാണണമെന്നും പറഞ്ഞു വാതിലിനു പുറത്തേക്ക് പോകാൻ ശ്രമിച്ച യുവതിയെ വിമാന ജീവനക്കാർ പിന്തിരിപ്പിക്കാൻ ശ്രമിച്ചു. എന്നാൽ, ജീവനക്കാരെ വെട്ടിച്ച് യുവതി പുറത്തേക്ക് ഓടുകയായിരുന്നു. യുവതിയുടെ അപ്രതീക്ഷിത നീക്കത്തിൽ ജീവനക്കാരും അമ്പരന്നു.
വിമാനത്തിന് പുറത്തേക്ക് ഓടി ഇറങ്ങിയ യുവതിയെ ഗ്രൗണ്ട് സ്റ്റാഫ് വളഞ്ഞെങ്കിലും അവർ ഗ്രൗണ്ട് സ്റ്റാഫിനെയും വെട്ടിച്ച് തലങ്ങും വിലങ്ങും വിമാനത്തിന് സമീപം ഓടിക്കൊണ്ടിരുന്നു.
തുടർന്ന് ദുബായ് പോലീസ് എത്തി യുവതിയെ കസ്റ്റഡിയിൽ എടുത്തു. യുവതിയുടെ യാത്ര മുടങ്ങി. ഇവരുടെ വിലാസം വ്യക്തമായിട്ടില്ല. വിമാനത്തിൽ ഏറെയും മലയാളികളായിരുന്നു. അതീവ സുരക്ഷ മേഖലയിലുള്ള യുവതിയുടെ പ്രകടനം ആശങ്ക സൃഷ്ടിക്കുകയും വിമാനം പുറപ്പെടാൻ 25 മിനിറ്റ് വൈകുകയും ചെയ്തു. എന്നാൽ, കൃത്യ സമയത്തിന് പത്ത് മിനിറ്റ് മുമ്പ് വിമാനം കണ്ണൂരിൽ ലാൻഡ് ചെയ്തു.
