കോട്ടയം: സ്വകാര്യ ബസില്‍ യുവതിയെ കടന്നുപിടിച്ച പോലീസുകാരന് സസ്‌പെന്‍ഷന്‍. ഇടുക്കി പെരുവന്താനം സ്‌റ്റേഷനിലെ സീനിയര്‍ സിവില്‍ പോലീസ് ഓഫീസറായ പെരുവന്താനം തത്തൻപാറയിൽ അജാസ്‌മോനെതിരേയാണ് (35) നടപടി. കേസിൽ പൊൻകുന്നം പോലീസ് അറസ്റ്റ് ചെയ്ത ഇയാളെ റിമാൻഡ് ചെയ്തു.
ശനിയാഴ്ച വൈകിട്ട് മൂന്നോടെ പൊൻകുന്നത്താണു സംഭവം. കോട്ടയത്തുനിന്ന് മുണ്ടക്കയത്തേക്ക് സ്വകാര്യ ബസിൽ യാത്ര ചെയ്യുകയായിരുന്ന യുവതിയെയാണ് ഇയാൾ കടന്നുപിടിച്ചത്.
ഒന്‍പതുമാസം പ്രായമുള്ള കുഞ്ഞുമായാണ് യുവതി ബസില്‍ കയറിയത്. യാത്രയ്ക്കിടെ യുവതി കുഞ്ഞിനു പാലുകൊടുത്തിരുന്നു. ഈ സമയത്ത് അജാസ് മോന്‍ കടന്നുപിടിച്ചെന്നാണ് യുവതിയുടെ പരാതി.
അതിക്രമം ഉണ്ടായതിനു പിന്നാലെ പൊന്‍കുന്നത്ത് ബസ് ഇറങ്ങിയ യുവതി മറ്റൊരു ബസില്‍ കയറി. എന്നാല്‍, അജാസ് മോനും യുവതിയെ പിന്തുടര്‍ന്നെത്തി ഇതേ ബസില്‍ കയറി. ഇതോടെ യുവതി ഭര്‍ത്താവിനെയും ബന്ധുക്കളെയും വിവരമറിയിച്ചു.
തുടര്‍ന്ന് ബസ് കാഞ്ഞിരപ്പള്ളിയില്‍ എത്തിയപ്പോള്‍ യുവതി ഇവിടെയിറങ്ങി. തൊട്ടുപിന്നാലെ പ്രതിയും ബസില്‍ നിന്നിറങ്ങി. തുടർന്ന് സ്ഥലത്തുണ്ടായിരുന്ന യുവതിയുടെ ബന്ധുക്കള്‍ പ്രതിയെ പിടികൂടി പോലീസില്‍ ഏല്‍പ്പിക്കുകയായിരുന്നു.
