ഇന്ത്യന്‍ ടെന്നീസ് താരം സാനിയ മിര്‍സയും പാക് ക്രിക്കറ്റര്‍ ഷൊയ്ബ് മാലിക്കും വിവാഹബന്ധം വേര്‍പെടുത്തുന്നുവെന്ന വാര്‍ത്തകള്‍ പ്രചരിച്ചു തുടങ്ങിയിട്ട് ദിവസങ്ങളായെങ്കിലും താരങ്ങള്‍ ഇക്കാര്യത്തില്‍ ഇതുവരെ സ്ഥിരീകരണം നല്‍കിയിട്ടില്ല.
ഇരുവരും വേര്‍പിരിഞ്ഞാണ് കഴിയുന്നതെന്നും ഇനി നിയമപരമായ നടപടികള്‍ മാത്രമേ ബാക്കിയുള്ളൂവെന്നുമാണ് ഇരുവരുടേയും അടുത്ത സുഹൃത്തുക്കളെ ഉദ്ധരിച്ച് മാധ്യമങ്ങള്‍ റിപ്പോര്‍ട്ട് ചെയ്തത്.
ഇതിനിടയിലാണ് ആരാധകരെ ഞെട്ടിച്ച് താരങ്ങളെ ഒന്നിച്ചു നിര്‍ത്തിയുള്ള റിയാലിറ്റി ഷോയുമായി ഒടിടി പ്ലാറ്റ്‌ഫോമായ ഉര്‍ദുഫ്‌ളിക്‌സിന്റെ പോസ്റ്റര്‍ പുറത്തുവന്നത്.
പാകിസ്ഥാനിലെ ആദ്യ ഉര്‍ദു ഒടിടി പ്ലാറ്റ്‌ഫോമാണ് ഉര്‍ദുഫ്‌ളിക്‌സ്. ‘ദി മിര്‍സ മാലിക് ഷോ’ എന്ന പേരിട്ടിരിക്കുന്ന പരിപാടിയിലാണ് സാനിയയേയും ഷൊയ്ബ് മാലിക്കിനേയും ഒന്നിച്ച് കാണിച്ചിരിക്കുന്നത്.
പരിപാടി ഉടന്‍ തന്നെ സംപ്രേഷണം ചെയ്യുമെന്നും സോഷ്യല്‍മീഡിയില്‍ പങ്കുവെച്ച പോസ്റ്ററില്‍ പറയുന്നു. എന്തായാലും വേര്‍പിരിയല്‍ വാര്‍ത്തയില്‍ നിരാശരായ ആരാധകര്‍ക്ക് പ്രതീക്ഷ നല്‍കുന്നതാണ് പോസ്റ്റര്‍.
ഇരുവരേയും ഒന്നിച്ച് കാണാന്‍ സാധിച്ചതില്‍ സന്തോഷമുണ്ടെന്നാണ് ആരാധകര്‍ പറയുന്നത്.
